Gjatë këtyre ditëve, lajmi më i bujshëm dhe i 'servirur' me kujdes nga Erion Veliaj, ka qenë martesa e dy vajzave homoseksuale në tarracën e Bashkisë Tiranë.
Për të zhvendosur vëmendjen nga protestat, vjedhjet, skandalet, korrupsioni dhe lidhja me krimin e pushtetit qendor dhe vendor, Veliaj dha 'bekimin' për kryerjen e kësaj ceremonie martesore, edhe pse kundër çdo ligji që parashikon Kushtetua e Shqipërisë, me synimin e një shfaqeve simbolike në një vend tradicional si Shqipëria.
Dy vajzat e veshura me fustane nusërie morën bekimin e pastorit gay Andy Fitchet, i cili erdhi nga Anglia posaçërisht për këtë ceremoni, e para e këtij lloji në vendin tonë.
Por kjo ceremoni dhe zgjedhja e këtij 'prfti' ka ngjallur shumë reagime dhe e para që doli zyrtarisht me një deklaratë ishte Kisha Katolike e Shqipërisë. Me anë të zëdhënësit Dom Mark Pashkja, kisha sqaroi të gjithë besimtarët dhe mbarë opinionin publik se martesa mes personave të së njëjtës gjini është e papranueshme dhe kategorikisht e ndaluar.
Gjithashtu, Kisha tha se lejimi dhe publikimi i ceremonive të tilla në institucionet shtetërore janë të papranueshme për sa kohë martesat mes të njëjtës gjini nuk janë të aprovuara me ligj në vendin tonë.
Në lidhje me këtë gjë Kisha katolike në Shqipëri dëshiron të sqarojë të gjithë besimtarët dhe mbarë opinionin publik që:
a) Bazuar në Doktrinën, Traditën dhe Magjisterin e Kishës, martesa mes personave të së njëjtës gjini është e papranueshme dhe kategorikisht e ndaluar.
b) Lejimi dhe publikimi i ceremonive të tilla në institucionet shtetërore janë të papranueshme për sa kohë martesat mes të njëjtës gjini nuk janë të aprovuara me ligj në vendin tonë.
c) Personi në foto edhe pse paraqitet nga ana e jashtme me veshjen e një kleriku katolik, nuk ka asnjë lidhje me Kishën katolike dhe nuk përfaqëson asgjë tonën.
Menjëherë pas Kishës, edhe Komuniteti Mysliman 'u zgjua nga gjumi' dhe doli me një reagim zyrtar për këtë martesë duke i bërë thirrje bashkisë së Tiranës që “të jetë më e kujdesshme ndaj ngjarjeve të tilla”.
"Zhvillimi i një procedure të tillë në kundërshtim me ligjin shqiptar dhe Kodin e Familjes së Republikës së Shqipërisë është një veprim i rrezikshëm për të legalizuar dhe normalizuar një proces që tenton të imponohet pa dëshirë përmes shkatërrimit të familjes dhe kulturës tonë kombëtare. Ne, këshillojmë dhe u bëjmë thirrje institucioneve të jenë të kujdesshëm ndaj ngjarjeve të tilla duke mos u profilizuar në drejtimin e kundërt me pjesën dërrmuese të votuesve dhe taksapaguesve shqiptarë. Myftinia Tiranë, mbetet e angazhuar tërësisht dhe fuqimisht në mbështetjen dhe promovimin e vlerave të familjes si thelbi i shoqërive të krijuara nga Zoti i Lartësuar për mbarëvajtjen e njerëzimit.
Por reagimet e këtyre dy institucioneve të besimeve fetare në vend duket se bien ndesh me aktivitetin e përditshëm në bashkëpunim me Bashkinë Tiranë, por edhe qeverinë.
Rastet kur këto institucione janë vendosur në shërbim të propagandës së Erion Veliajt dhe Ramës janë të shpeshta. Këtu mund të përmendim lirisht Iftaret e Veliajt me kreun e KMSH Bujar Spahiun gjatë muajit të shenjtë të Ramazanit, apo edhe vaktet për shtresat në nevojë me priftërinjtë e Kishës Katolike pasi para se të konsumohen vaktet, nuk mungojnë fjalimet propagandistike duke e zbehur plotësisht qëllimin që duhet të kenë organizime të tilla.
Ndërkohë që një abuzim i Veliajt me Kishën Katolike është edhe një rast në muajin shkurt, ku ai u shfaq në ambientet e Katedrales e “Shën Palit” në Tiranë për të mbajtur një fjalim propagandistik. Me një mospërfillje totale ndaj altarit apo edhe vendit të shenjtë të besimtarëve katolikë, Veliaj mbajti një fjalim politik e propagandistik duke iu dhënë mend pjesëmarrësve në meshë se çfarë është modestia dhe puna shpirtërore me popullin. Ky veprim irritoi pa masë besimtarët katolikë të cilët nuk arritën ta kuptonin se çfarë donte një politikan që gënjen e mashtron përditë qytetarët, duke mbajtur fjalim në Shtëpinë e Zotit.
Përveç këtyre rasteve, ka edhe shumë të tjera ku Kisha dhe Xhamia janë vendosur në dispozicion total të politikës duke lënë mënjanë qëllimin nga i cili udhëhiqen.
