Një qokë e majme ka dalë ditën e sotme nga dora e vetë kryetarit të bashkisë Erion Veliaj për disa miq të vjetër të tij oligarkë. Për fjalë për një tender mbi 4,5 Miliard Lekë nga taksat tona që do shkojnë për sigurinë e godinave të bashkisë Tiranë.
Fitues si konkurrentë të vetëm të parave publike në këtë tender janë dy adashët Ilir Hoxhallari dhe Ilir Mane. Ilirët me kompaninë e tyre, respektivisht “PC Security” shpk dhe “Elektrosek” shpk kanë fituar taksat e popullit me Flamur të Kuq për “Mungesë Konkurrence”, në shkelje të ligjit të Prokurimeve Publike pasi kanë qenë të vetmit që janë futur në lojën e thesit të madh të parave publike dhe kanë garuar me veten.
“Elektrosek” me pronar Ilir Manen me 100% të aksioneve, ka përfituar deri më sot nga qeverisja vendore tendera në vlerën e mbi 1,5 Miliard Lekëve si operator i vetëm ekonomik, 1,5 Miliard Lekë në institucionet shtetërore dhe shumë miliona të tjerë në bashkëpunim me të tjera kompani.
Ky person i cili njihet si “spiuni” i Veliajt, pasi i jep akses këtij të fundit në çdo kamer që do të instalohet në institucionet e bashkisë, është përfolur edhe më parë se ish-zari i ish-kryetarit të Elbasanit Qazim Sejdinit.
Po ashtu një derdhje prej mbi 2,4 Miliard Lekësh transaksione nga Thesari i Shtetit kanë shkuar për xhepat e Manes nga viti 2019 e deri më tani.
“Elektrosek” ka histori të bujshme po ashtu si një prej kompanive më të favorizuara në abuzimet me prokurimet publike të institucioneve shtetërore. Pak kohë më parë u zbulua skandali i një tenderi të paracaktuar për Manen nga Posta Shqiptare. Ende burimet dhe të ardhurat e kësaj kompanie dhe procedurat shkelëse me anë të të cilave pronari i saj fut në xhep paratë e popullit, nuk janë hetuar nga SPAK.
Nga ana tjetër, historia oligarkike e “PC Security” ka rrënjë më të thella sepse përfshin disa thela të sektorit publik ku përfaqësuesit e saj janë shpallur investitorë strategjikë me frutin goji berri, investitorë e ndërtues vilash në Dhërmi e sipërmarrës impiantesh fotovoltaike për prodhim energjie nga dielli si nevojë e krizave inekzistente që shpall Belinda Balluku.
Kjo kompani ka përfituar një shumë të majme nga taksat e popullit në bashkëpunim me të tjera kompani sigurimesh si ajo e Gjicit apo e Breçanit.
Ilir Hoxhallari në bashkëpunim me ortakun e tij Ilir Trebickën, duke i bërë oligarkët e Veliajt treshen e Ilirëve në kub, janë shpallur investitorë strategjikë nga për një fermë me frutin goji berry në Divjakë në vitin 2018.
Plani i zhvillimit ishte për 800 hektarë por ky eksperiment dështoi pas disa viteve pasi kulturat rezultuan jo të përshtatshme për kultivim në tokë të kripur. Por në vitin 2020 kompania e fitoi statusin e investitorit strategjik duke shtuar tre kultura të reja të përshtatshme: Rrushin, dardhën dhe kivin. Kështu me anë të së njëjtit vendim u miratua edhe leja për ndërtimin e një agroturizmi brenda në fermë.
Më pas në zonën e përfituar nga shteti me 1€, Ilir Hoxhallari dhe Trebicka diversifikuan planin e tyre duke ndërtuar një impiant fotovoltaik për t’i shitur shtetit shqiptar energji me lejen e Belinda Ballukut e cila në kohën kur shteti shpalli krizën e supozuar ndërkohë që shiste lirë energji në treg dhe e blinte dyfish më shtrenjtë.