Uji në kanalin kryesor të Venecias u kthye në të gjelbër fluoreshente ditën e sotme.
Agjencia rajonale e mbrojtjes së mjedisit mblodhi mostra të ujit të ngjyrosur me ndihmën e zjarrfikësve. Ekspertët e agjencisë tani po hetojnë për shkakun e ndryshimit të ngjyrës.
Ndryshimi i ngjyrës, sipas hetimeve paraprake u shkaktua nga një lloj ngjyre që përdoret shpesh për të gjurmuar rrjedhjet e ujit. Policia tha se uji nuk përbënte kërcënim për shëndetin e banorëve lokalë.
Uji i gjelbër i ndezur shtrihej nga Ura e Rialtos deri në një pjesë të Kanalit të Madh. Kreu i rajonit Veneto, Luca Zaia, tha se ngjyra e gjelbër u raportua fillimisht nga banorët vendas. Ndërkohë që asnjë person apo grup nuk mori përgjegjësinë për gjelbërimin e Kanalit të Madh.
Vlen të thuhet se fundjavën e kaluar, një grup ambientalist përdori qymyr për të bërë të zi ujin e shatërvanit Trevi në Romë për të protestuar ndaj politikave të qeverisë për klimën.
