Kjo është një situatë në të cilën mund të jenë gjendur shumë vajza. Në një letër drejtuar Bustle, një vajzë pranon se është e dashuruar me shokun e saj më të mirë, ndërsa ai duket se nuk ka të njëjtat ndjenja për të, pavarësisht se kanë bërë edhe dashuri.
“Jam e dashuruar me shokun tim më të mirë. Kimia jonë është unike. Plotësojmë fjalitë e njëri-tjetrit, duam të njëjtat gjëra dhe argëtohemi shumë. Marrëdhëniet dhe takimet e mia me meshkuj të tjerë janë të vështira. Me shokun tim e vërteta është se ne kemi fjetur bashkë disa herë. Kjo ka ndodhur kohë më parë, por jemi frekuentuar edhe së fundmi.
Ai duket se nuk ndjen të njëjtën gjë për mua, sepse shoqërohet vazhdimisht me vajza të bukura. Shumicën e kohës e kaloj duke u shqetësuar se mos nuk jam mjaftueshëm e mirë për të, gjë që ka ndikuar shumë në besimin tim. Tani ai është në një lidhje me një vajzë tjetër. Ndjej sikur zemra do të më pëlcasë nga dhimbja. Nuk mund ta imagjinoj jetën time pa të. Ka ndonjë mënyrë për ta kaluar këtë gjendje?”shkruan vajza në letrën e saj dërguar ekspertit.
Ndërsa ky i fundit përgjigjet: “Mendoj se pyetja që duhet t'i përgjigjeni së pari është se cilat pjesë të marrëdhënies suaj nuk çojnë në seks. Natyrisht në të dyja anët ekziston kjo tërheqje, është e zakonshme edhe në miqësi të tjera. Çfarë ju pëlqen tek ky djalë që nuk ka lidhje me flirtin apo seksin? Përgjigjuni vetes sinqerisht dhe do të kuptoni shumë.
Nuk është keq të pranoni se miqësia juaj ishte diçka më shumë. Kjo nuk të bën më pak mik. Sigurisht, duhet të kuptoni se nëse doni që miqësia juaj me këtë person të mbijetojë, ajo do të duhet të ndryshojë. Pjesërisht sepse të dy keni ndjerë një tërheqje në të kaluarën dhe ende mbani ndjenja të tilla. Detyra juaj tani është të rindërtoni një miqësi. Do të jetë e vështirë dhe do t'ju duhet të përshtateni me rrethana të reja.
Unë ju sugjeroj të bëni një pushim tani. Lejojini vetes të përjetoni trishtimin, për një ose dy ditë. Qani, bërtisni, tërbohuni dhe shkruani të gjitha mendimet tuaja, edhe ato më të çmendurat. Shkoni për shëtitje, jini vetëm, bëni pazar ose filloni një hobi të çmendur.
Pasi të keni kaluar pikëllimin, bëjini vetes disa pyetje dhe bëni plane të reja. Si do t'i kanalizoni ndjenjat tuaja për dikë që nuk përfshin shokun tuaj? Si do ta çlironi energjinë tuaj seksuale pa qenë ai pjesë e saj? Lexoni një libër ose masturbohuni dhe ndjehuni të lirë të flirtoni.
Hapi tjetër është të pranoni versionin e ri të miqësisë dhe ta shihni atë me sy të pastër. Në fillim, mund të mendoni se ky version i ri i miqësisë nuk ju përshtatet ose nuk ka të bëjë fare me atë që keni pasur më parë. Nëse vërtet dëshironi ta mbani këtë person në jetën tuaj, do ta kaloni këtë pjesë dhe do të vazhdoni përpara. Duhet të mbani mend, sigurisht, se gjërat mund të mos funksionojnë që në fillim.
Jo sepse keni bërë seks, por sepse njerëzit kur janë në një lidhje të re priren të jenë mjaft agresivë ndaj atyre me të cilët kanë qenë të përfshirë në mënyrë romantike në të kaluarën. Prioriteti do të jetë marrëdhënia dhe ju duhet ta respektoni atë. Sigurisht që në kuadër duhet të përfshihet edhe partnerja e tij e ri. Bëjeni atë të ndihet pjesë e miqësisë dhe shoqërisë suaj. Miqësia juaj (nëse e dëshironi vërtet) mund të lulëzojë pavarësisht vështirësive dhe situatave të çuditshme.
Ju duhet të pranoni ndjenjat tuaja, të punoni në miqësinë tuaj (e theksoj, nëse kjo është ajo që dëshironi) dhe të jeni të durueshëm. Vazhdoni të jetoni. Bëni miq, bëni njohje të reja, jo si hakmarrje, por sepse e doni veten”.