Çifti Rama-Veliaj mbyll instagramin e JOQ Albania 

Shkruar nga: M Gjini | Publikuar më: 24.10.2022, 22:03

Pak momente më parë nëpërmjet një sulmi të organizuar nga patronazhistët e çiftit Rama-Veliaj, ashtu siç e kishim paralajmëruar, u mbyll llogaria në instagram e Joq Albania me mbi 1.3 milionë ndjekës. Me sa duket e vërteta therëse e realitetit që na rrethon, e denoncuar nga qindra-mijëra shqiptarë në inboxin e Joq Albania, i ka prishur propagandën dyshes Rama-Veliaj në prag të zgjedhjeve vendore.

Por përse dhe si ka ndodhur mbyllja e llogarisë së instagramit me 1.3 milionë ndjekës të Joq Albania nga ana e patronazhistëve që paguhen nga taksat tona? Po ju bëjmë më poshtë një panoramë sa më të detajuar për të kuptuar se çfarë ka ndodhur.

RASTI 1

E gjitha filloi me një video të publikuar pak ditë më parë në rastin e përmbytjes nga shiu të lagjeve në Don Bosco, Tiranë. Video në fjalë ishte hedhur si story në instagramin zyrtar të Joq Albania. Befas pak orë më pas ajo fshihet nga instagrami me arsyen absurde se story në fjalë ishte kundër udhëzimeve ndaj dhunës dhe organizatave të rrezikshme. Sipas kësaj logjike, duke publikuar një video ku tregohej përmbytja e rrugëve në Don Bosco, ishte dhunë dhe organizim i rrezikshëm. Nuk kuptohet se për kë ishte dhuna apo organizimi i rrezikshëm në këtë rast veçse kundra propagandës së Erion Veliaj dhe paraqitjes me fakte se rrugët në Don Bosco ishin përmbytur. Në vijim do të gjeni videon në fjalë ku duket fare qartë se nuk ka lidhje as me dhunën dhe as me organizatat e rrezikshme.

RASTI 2

Rasti i dytë kishte të bënte më një lajm të përkthyer nga mediat më prestigjoze ndërkombëtare. Sipas një raporti shkencor, luajtja e video-lojërave mund të shkaktojë aritmi kardiake kërcënuese për jetën tek fëmijët me sëmundje të padiagnostikuara të zemrës. Në raportin e botuar në revistën “Heart Rhythm”, shkencëtarët u kërkuan prindërve që t'i çojnë fëmijët që vuajnë nga ulja e tensionit apo të fikëtit gjatë lojës, tek një specialist i zemrës. Madje sipas specialistes Dr Claire M Lawley, "Video-lojërat mund të përfaqësojnë një rrezik serioz për disa fëmijë me kushte aritmike; ato mund të jenë vdekjeprurëse në pacientët me kushte aritmike predispozuese, por shpesh të panjohura më parë”. Ky lajm u publikua nga Joq Albania për të informuar prindërit në mënyrë që të bëjnë konsulta tek mjeku nëse fëmijët e tyre kanë patur episode të humbjes së ndjenjave gjatë lojërave elektronike, pasi në rast neglizhence mund të shpinte deri në vdekje tek fëmijët. Lajmi në fjalë u publikua edhe si story në instagramin e Joq Albania. Vetëm pak orë më pas, për habi story u fshi, me të njëjtin motivacion: ishte kundër udhëzimeve të instagramit ndaj dhunës dhe organizatave të rrezikshme. Kjo fshirje ishte me të vërtetë absurde pasi as në këtë rast nuk bëhet fjalë për dhunë apo organizata të rrezikshme.

RASTI 3

Rasti i tretë ishte akoma më i pabesueshëm nga dy të tjerët. Joq Albania bëri një lajm në lidhje me 6 të rinj shqiptarë të konsideruar si heronj të vërtetë për shkak se për vetëm 33 orë plotësuan shumën e konsiderueshme prej 600.000€ për të ndihmuar Klevis Gjelucën, djalin e aksidentuar në Shkodër për t’u kuruar në një spital në Romë. Bëhet fjalë për Aleks Vishën , Ideal Domin , Rudian Balliun, Fabio Dushkun, Flori dhe Dijonis Biba, së bashku me disa djem të tjerë. Ky lajm i cili ngriti peshë zemrat e shqiptarëve për shkak të humanizmit dhe reagimit tepër të shpejtë të treguar, u hodh edhe si story në instagramin zyrtar të Joq Albania. Për habi, pak orë më pas kjo story fshihet nga instagrami me të njëjtin motivacion: ishte kundër udhëzimeve ndaj dhunës dhe organizatave të rrezikshme. Është e paqartë nga çdo mendje e shëndoshë se si mund të jetë nxitje dhune apo organizim i dhunshëm ndihma që 6 të rinj i dhanë Klevisit për të plotësuar në kohë rekord shumën e nevojshme që të kurohej në Itali. Ndoshta çifti Rama-Veliaj ngelën pa fjalë nga organizimi i popullit në kohë rekord krahasuar me peripecitë dhe ngathtësinë e një shteti të tërë kur vjen puna për të ndihmuar shqiptarët.

RASTI 4

Të impresionuar nga veprimi i madh human i gjashtë të rinjve për të mbledhur shumën e konsiderueshme për dërgimin e Klevisit për kurim në Itali, Joq Albania bëri një sondazh nëpërmjet një story në llogarinë e saj zyrtare në instagram. Pyetja e sondazhit ishte: “Kush e meriton ta drejtojë Tiranën”? Si përgjigje të sondazhit ishin dy alternativat e mëposhtme: A) “Çunat që mblodhën donacionet për Klevisin” dhe B) “Erion Veliaj me grupin e tij”. Votimi ishte masiv dhe 98% e publikut zgjodhi padyshim alternativën e parë, pra: “Çunat që mblodhën donacionet për Klevisin”. Edhe kësaj rradhe instagrami e fshiu storyn egzaktësisht për të njëjtin motiv: story ishte kundër udhëzimeve të instagramit ndaj dhunës dhe organizatave të rrezikshme. E vetmja dhunë që mund të përceptohet në këtë rast, është “dhuna” e 98% të votuesëve që votuan kundër Erion Veliajt.

RASTI 5

Të ndodhur në një seri të njëpasnjëshme sulmesh dhe fshirjesh të storyve brenda pak ditësh, Joq Albania bëri një postim në faqen e saj në instagram ku paraqiste situatën ndaj publikut se si storyt e saj ishin fshirë në mënyrë të habitshme nga sulmi i Erion Veliaj dhe G-99 të tij. Në këtë postim u paraqitën mesazhet e ardhura nga instagrami për storyt e fshira me motivacionin absurd se ishin kundër udhëzimeve të instagramit ndaj dhunës dhe organizatave të rrezikshme. Edhe ky post në mënyrë absurde u fshi nga ana e instagramit po për të njëjtin motiv “dhunë dhe organizata të rrezikshme”.

RASTI 6

Rasti i gjashtë dhe i fundit ishte përveçse i habitshëm, edhe për të vënë duart në kokë. Një lajm kronike ku një polic kufitar aksidentoi për vdekje një të mitur në moshën 12-vjeçare, u raportua thuajse nga të gjitha mediat. Ky lajm u raportua edhe nga gazetarët e Joq Albania dhe u paraqit edhe në story. Titulli i lajmit ishte: “Polici kufitar aksidenton për vdekje 12-vjeçarin në Gjirokastër”. E gjeni dot se çfarë ndodhi? Edhe në këtë rast pak orë pas publikimit të storyt, instagrami e fshiu përsëri me të njëjtin motiv si 5 rastet e mëparshme: story konsiderohej kundër udhëzimeve të instagramit ndaj dhunës dhe organizatave të rrezikshme. Ky story kishte si foto ilustruese një makinë policie. Në këtë rast pyetja që ngrihet është: A mos vallë instagrami e konsideron policinë shqiptare si të dhunshme dhe si organizatë të rrezikshme?

Të gjitha këto sulme të njëpasnjëshme me të njëjtin motiv dhe për një hark kaq të shkurtër kohor tregojnë qartësisht se një armatë e tërë patronazhistësh që paguhen nga taksat e shqiptarëve kanë raportuar për dhunë çdo story të publikuar nga Joq Albania. Pra me lekët e taksave të shqiptarëve, çifti Rama-Veliaj kanë mbyllur instagramin e të vetmes media ku çdo shqiptar pa dallim gjente një vend ku halli i tij pasqyrohej pa mëdyshje e pa censurim.

Ndërkaq Joq Albania duke falënderuar të gjithë shqiptarët kudo që ndodhen, ju fton të ndiqni profilin tonë të dytë në instagram me emrin Joq News.

Pavarësisht sulmeve të njëpasnjëshme për të mbyllur të vetmin zë ende të pa shitur në media, Joq Albania me kaq sa ka mundësi pas mbylljes së instagramit me 1.3 milionë ndjekës, vazhdon dhe do të jetë gjithmonë në shërbim të së vërtetës, të zbatimit të ligjit dhe si zë i pamohueshëm i çdo shqiptari! Faleminderit për mbështetjen tuaj të pakufizuar!

FACT CHECK: Synimi i JOQ Albania është t’i paraqesë lajmet në mënyrë të saktë dhe të drejtë. Nëse ju shikoni diçka që nuk shkon, jeni të lutur të na e raportoni këtu.
HEROI I MUAJIT
KLIKO PËR TË VOTUAR
  • I riu nga Tirana
    Është i riu, i cili bëri gjestin, që jo çdokush do e bënte. Pasi pa një qytetar, që hapi pusetën në mes të rrugës për të rënë makinat, i riu e ndoqi atë, derisa e kapi dhe e paralajmëroi që të shkonte të mbyllte pusetën, pasi do e denonconte në polici. Gjesti i këtij qytetari është për t'u duartrokitur, pasi shumë e shumë të tjerë nuk do e bënin.
    Vajza që gjeti Brajanin
    Kandidatja e dytë është vajza, e cila gjeti Brajanin e vogël, që ishte larguar nga shtëpia. I mituri ishte me autizëm dhe ajo u kujdes për të derisa të mbërrinin familjarët për ta marrë.
    Erion Veliaj
    I treti, është kryebashkiaku i Tiranës, Erion Veliaj. Kujtojmë se Veliaj dikur ka tregtuar fiq në trotuar. Gjithsesi, ai sot gëzon shumë pasuri dhe kjo nuk e ka penguar të jetë i thjeshtë duke shtyrë një person me aftësi ndryshe, në Maratonën e Tiranës. Qytetari i cili dërgoi foton në inbox raporton se përkundrejt dëshirës së Veliajt të jetë anonim, ai dhe 30 kameramanë të tjerë kanë shkrepur fshehurazi veprimin human.
    Aleks Visha
    I katërti, është personazhi i njohur, Aleks Visha, i cili organizoi sfidën në Tik Tok, me disa persona të tjerë për të ndihmuar Klevisin, 20-vjeçarin, i cili ndodhej në gjendje kritike për jetën. Për më pak se 33 orë, ai mblodhi 300 mijë euro, duke bërë kështu të mundur dërgimin e Klevisit në një nga spitalet më të mirë në Europë.
    Mjeku human
    Kandidati i pestë është mjeku nga Kosova, i cili në xhamin e makinës, kishte vendosur numrin e tij, që personat që nuk kanë mundësi ekonomike për t’u vizituar ta kontaktojnë dhe mund t’ua ofrojë shërbimin pa pagesë. Teksti i tabelës shkruan: “Nëse keni nevojë për mjek dhe nuk keni mundësi të paguani, atëherë më ndaloni”.
    Pasagjeri në urban
    I gjashti, është i riu që reagoi ndaj dhunimit së një gruaje nga një burrë në urbanin e Kombinatit. Sipas raportimeve nga vendngjarja ai mori në mbrojtje gruan, që u shty me forcë nga një qytetar.
    17-vjeçari nga Vlora
    Kandidati i shtatë është 17-vjeçari nga Vlora, që doli në mes të rrugës dhe ndaloi makinat për të shpëtuar zogun që po përpëlitej. Ai e mori zogun dhe e dërgoi në një qendër veterinare.
    Gjimnazisti jo-servil
    Kandidati i tetë, por jo për nga rëndësia, është gjimnazisti, i cili, ndryshe nga të rinjtë e tjerë, i përplasi Ramës disa të vërteta në sy. Ai nuk ndoqi shembullin e bashkëmoshatarëve të tjerë, që në takimet me kryeministrin u servilosen, por tha disa fakte, që u duartrokitën nga të gjithë.
Më të Lexuarat
Shkarkoni aplikacionin JOQ ALBANIA në platformat
Më të fundit