Një aksident i rëndë ka ndodhur pasditen e sotme në rrugën Transballkanike, në qytetin e Vlorës.
Mësohet se një automjet tip "Benz" me targë VL 4450 C, ka përplasur një vajzë të re, e cila po udhëtonte me biçikletë.
Dhe ashtu siç ndodh rëndom në vendin tonë me shërbimin e Urgjencës, edhe kësaj here ambulanca është vonuar, duke bërë që dëshmitarët e ngjarjes që t'i japin ndihmën e parë të resë.
Më pas ajo është transportuar me një ambulancë funerali. E aksidentuara ka pësuar disa fraktura në kokë dhe trup, ndërkohë nuk dihet gjendja e saj shëndetësore.
Mësohet se shoqes së vajzës së aksidentuar i kanë rënë të fikët, kur ka parë skenën e rëndë.
Siç shihet dhe në pamjet që vijnë nga aksidenti, ka mbetur e shtrirë në asfalt dhe e gjakosur.
Policia ka nisur hetimet për zbardhjen e plotë të rrethanave të ngjarjes, ndërsa drejtuesi i mjetit është shoqëruar në komisariat.
Ky nuk është rasti i parë që ambulanca vonohet për të mbërritur në vendngjarje. Pak ditë më parë një aksident i rëndë i mori jetën një kalimtareje në Kamëz, ndërsa një qytetar tregoi për "JOQ Albania" se ambulanca u vonua rreth 80 minuta.
