Shoferja përplasi kalimtaren, vjen ambulanca ta shpëtojë, por i prishet dera

Një aksident i rëndë ndodhi mbrëmjen e sotme në Kamëz, ku një këmbësore u përplas për vdekje nga një makinë.

Sipas policisë, automjeti i drejtuar nga shtetasja B.D., aksidentoi 35-vjeçaren A.P., e cila ndërroi jetë.

Lidhur me aksidentin e rëndë, një qytetar ka dërguar një video në redaksinë e JOQ Albania, ku ndodhi një incident me ambulancën.

Sipas qytetarit, ambulancës iu prish dera dhe në vend që të transportonin të aksidentuarën në spital, ata po përpiqeshin të rregullonin derën.

Ai tregon se ambulanca ka ardhur me vonesë dhe e aksidentuara ka qëndruar rreth 1 orë e 20 minuta e shtrirë mbi asfalt.

Nuk dihet nëse viktima ka ndërruar jetë menjëherë pasi është përplasur, apo ka qenë vonesa e ambulancës ajo që i shkaktoi vdekjen.

Ky nuk është rasti i parë që ambulancat vonohen për të mbërritur në aksidente. Mirë që mbërrijnë me vonesë në vendngjarje, por duhet edhe që të rregullojnë derën e prishur.

Mesazhi i plotë:

Ja dhe ambulanca e rilindjes pasi beri 2 ore te vije ne vendngjarjen te aksidenti ne kamez i ra dhe dera ambulances dhe ne vend te ikin ne spital kto duhet akoma me rregullu deren. Para nje ore aty gjysem ore kisha un ndersa ato qe ishin te pranishem me than qe ka bere aksident dhe 30 minuta perpara se te beja videon un qe do te thote 1 ore e 20 minuta njeriu i shtrire dhe akoma skishte ardh ambulanca."

Kujtojmë këtu se pak ditë më parë një tjetër rast i ngjashëm ndodhi në Tiranë, ku ambulancës me një person të sëmurë brenda iu ça goma e mjetit. Ndërkohë nuk kishin as gomë rezervë.