Ashtu siç ishte paralajmëruar edhe më herët qindra qytetarë kanë dalë për të protestuar sërish për vrasjen e 7-vjeçares Jonada Avdia nga ish-efektivi Arjan Tase. Qytetarët kërkojnë drejtësi për vrasjen e 7-vjeçares dhe shkarkimin e ministrit të Brendshëm Bledi Çuçi, ministres së Turizmit Mirela Kumbaro dhe Drejtorit të Përgjithëm Gledis Nano, si personat përgjegjës për këtë masakër.
Qytetarët kanë lyer me bojë kuqe muret e Ministrisë së Brendshme si shenjë për të reaguar pas gjakut që uniformat blu po u marrin qytetarëve.
Ndërkohë pasi kanë mbërritur te Kryeministria, qytetarët janë ulur këmbëkryq për disa minuta në mes të bulevardit.
Shumë fëmijë që i janë bashkuar protestës për vrasjen e bashkëmoshatares së tyre janë ulur në shkallët e Kryeministrisë me pankarta në duar.
