Ashtu siç ishte parashikuar edhe më parë, ditën e sotme në orën 12:00 ka nisur protesta paqësore para Ambasadës së Kosovës kundër vaksinimit me detyrim dhe masave kufizuese që përjashtojnë shqiptarët për të hyrë në territorin e Kosovës. Qytetarët me mbështetjen e avokatit Altin Goxhaj kundërshtojnë vendimin e qeverisë së Albin Kurtit që nga data 3 janar 2022 të gjithë shqiptarët që duan të hyjnë në Kosovë të jenë të pajisur me çertifikatë vaksinimi me të dyja dozat. Por sipas qytetarëve një vendim i tillë nuk është i drejtë pasi i detyron shqiptarët që të vaksinohen për të vizituar Kosovën, ndërkohë që ka vende evropiane që nuk e kërkojnë një gjë të tillë për të vizituar vendet fqinje.
Ata kërkojnë që një vendim i tillë të hiqet menjëherë pasi i privon për të lëvizur të lirë, por edhe i detyron për t'u vaksinuar pa patur dëshirë. Madje ata shtojnë se do të ketë edhe përshkallëzim protestash nëse ky vendim nuk ndryshon.
