Një gjykatë në Brazil dënoi me 60 vjet burg një grua të re, e cila akuzohet për kryerjen e një krimi monstruoz.
27-vjeçarja, Rozalba Maria Grime, u shpall fajtore nga gjykata për vrasjen e një gruaje shtatzanë me qëllim që t'i vidhte foshnjën nga barku.
Ajo dyshohet se joshi viktimën, të cilën dyshohet se e njihte, dhe më pas e goditi për vdekje me një tullë. Pasi u sigurua që gruaja shtatzanë kishte vdekur, ajo i çau barkun për t'i marrë foshnjën dhe e fshehu trupin e së ndjerës në një furrë.
Gjyqi, i cili zgjati rreth 15 orë, e shpalli fajtore 27-vjeçaren për vrasje të rëndë, tentativë për vrasje të foshnjës, fshehje të kufomës, pengim të drejtësisë, rrëmbim të të miturve dhe mohim i të drejtave të një të porsalinduri.
Krimi tronditës ndodhi në qytetin Canelinha më 24 gusht të vitit të kaluar.
Viktima e këtij krimi monstruez ishte një mësuese e quajtur Flavia Godinhno Mafra, e cila vdiq pasi u godit disa herë në kokë me një tullë.
Gjatë seancës gjyqësore, autorja 27-vjeçare tha se e kishte planifikuar krimin dhe se kishte studiur se si të hiqte një fëmijë të palindur nga barku i nënës.
Ajo gjithashtu tregoi se kishte hulumtuar se si të simulonte simptomat e shtatzënisë dhe lindjes.
Pas krimit, 27-vjeçarja shkoi në spital me partnerin e saj, i cili besonte se ajo kishte mbetur shtatzanë dhe sapo kishte lindur.
Ajo i tha stafit se kishte lindur në rrugë. Mirëpo, stafi i spitalit dyshoi për vërtetësinë e fjalëve të saj dhe lajmëroi policinë.
Partneri i saj fillimisht dyshohej për përfshirje në krim. Megjithatë, ai u lirua nga paraburgimi më 7 tetor të vitit të kaluar dhe u shpall i pafajshëm më 27 korrik të këtij viti.
Prokurori arriti në përfundimin se vërtet mendonte se partnerja e tij kishte qenë shtatzënë.
Burimi: The Mirror|Përktheu dhe Përshtati: JOQ Albania
