Personi që organizoi fluturimin ku vdiqën futbollisti Emiliano Sala dhe piloti David Ibbotson, në janar 2019, është dënuar me 18 muaj burg. Sala po fluturonte nga Franca në Cardiff, pas transferimit të tij nga Nantes në Cardiff City në merkaton e janarit, kur avioni që transportonte dy burrat u rrëzua në Kanal. David Henderson, 67 vjeç, ishte njeriu që organizoi fluturimin e Sala nga Cardiff në Nantes dhe udhëtimin e kthimit dy ditë më vonë, pasi lojtari u kishte thënë lamtumirë ish-shokëve të tij të skuadrës.
Burri nga Yorkshire u arrestua në qershor të të njëjtit vit dhe muajin e kaluar u shpall fajtor për rrezikimin e pakujdesshëm të sigurisë së një avioni. Të premten ai u dënua me 18 muaj burg, pasi pranoi gjithashtu akuzën për përpjekjen për të organizuar një fluturim për një pasagjer pa leje ose autorizim. Henderson fillimisht supozohej të ishte piloti në fluturime, por ishte me pushime në Paris, me gruan e tij, në atë kohë dhe kështu i kërkoi Ibbotson të zinte vendin e tij. Gjykata dëgjoi se Ibbotson kishte fluturuar për Henderson më parë, por nuk kishte një licencë komerciale për transportin e pasagjerëve dhe as nuk ishte në gjendje të fluturonte natën.
Vlerësimi i tij për të fluturuar me aeroplanin që u rrëzua atë natë kishte skaduar gjithashtu, që do të thotë se kishte tre arsye pse Henderson nuk duhet të kishte marrë Ibbotson për të fluturuar me aeroplanin. Gjykatësi, z. Justice Foxton, tha se Henderson kishte thyer rregulloret e Autoritetit të Aviacionit Civil "për arsye përfitimi" dhe ishte "i pamatur, jo thjesht neglizhent". Gjatë gjyqit, jurisë iu tha se Henderson u kishte dërguar mesazhe një numri njerëzish që të mos thoshin asgjë për përfshirjen e tij. Sala kishte rënë dakord tashmë për një transferim prej 15 milionë paundsh nga Ligue 1 në Cardiff, me skuadrën e atëhershme të Premierligës duke shpresuar se nënshkrimi i sulmuesit do t'i ndihmonte t'i mbante ata në nivelin më të lartë.
