Në një video të postuar në Instagram, presidenti serb Aleksandër Vuçiç ka folur sërish në lidhje me situatën e krijuar me Kosovën në kufi në Jarinje dhe Bërnjak. “Është e rëndësishme që të gjithë njerëzit të kuptojnë sa e vështirë është situata, sa të lidhur janë duart tona në Kosovë, por që ne duhet të luftojmë për popullin tonë. Nëse nuk luftojmë, atëherë kurrë nuk do të jemi në gjendje të arrijmë asgjë. Faleminderit njerëzve në këto ditë të vështira për mbështetjen e tyre, faleminderit njerëzve tanë në Jarinje dhe Brnjak, Serbia është me ju”- u shpreh presidenti Vuçiç.
Kujtojmë se situata është tensionuar pasi serbët bllokuan dy pikat kufitare. Shkak u bë vendimi i qeverisë së Kosovës për reciprocitetin e targave të makinave, që do të thotë se çdo qytetar serb që futet në Kosovë, duhet të ndërrojë përkohësisht targat dhe të qarkullojë me ato kosovare. Megjithatë me ndërhyrjen e SHBA-së dhe BE-së, pritet që gjendja të qetësohet, pasi ditën e nesërme, datë 29 shtator, palët do të takohen në Bruksel për të biseduar dhe gjetur gjuhën e përbashkët.