Një 25-vjeçar shqiptar është arrestuar në Britaninë e Madhe pasi punonte si roje në një shtëpi bari. Policia britanike ka arrestuar 25-vjeçarin shqiptar Noni Selenica, i cili kujdesej për një fermë kanabisi dhe ishte vënë re nga policët e patrullës dhe fqinjët rreth banesës ku po qendronte. Sipas mediave britanike, një efektiv policie kishte ndjerë aromën e kanabisit në lagje duke filluar të kërkonte se nga vinte. Ai e kishte pikasur shtëpinë dhe kishte trokitur, por askush nuk ia kishte hapur derën. Në banesën ku po qendronte 25-vjeçari shqiptar ndihej aroma e kanabisit, ndërsa perdet ishin tërësisht të ulura. Diçka e tillë ishte vënë re edhe nga fqinjët ngjitur të cilët kishin treguar se aty pranë qendronin tre të rinj të huaj, ndërsa përtej murit mund të dëgjohej zhurma e helikave të ventilatorëve të mëdhenj. Kur policia hyri brenda shtëpisë së barit dhe arrestoi 25-vjeçarin shqiptar si dhe sekuestroi një numër të madh rrënjesh kanabisi me vlerë tregu 152 000 paund. Në seancën gjyqësore shqiptari kishte thënë se kishte shkuar në Angli për një jetë më të mirë dhe se e dinte që kultivimi i kanabisit ishte i ndaluar, por se nuk kishte rrugë tjetër.Në fund, i riu shqiptar u dënua me 6 muaj burg, ndërsa gjykatësi urdhëroi konfiskimin e të gjitha pajisjeve për kultivimin e kanabisit.
