Në spitalin Rovereto në Itali disa punonjës shëndetësorë morën ujë me kripë(fiziologjik) në vend të vaksinës Pfizer. Incidenti dyshohet se kishte të bëjë me 12 persona, përfshirë mjekë, infermierë dhe punëtorë shëndetësorë. Tani Autoriteti Shëndetësor është detyruar të rikontrollojë të vaksinuarit e asaj dite, dhe nëse do të duhet do të kryhet dhe një test serologjik për të vërtetuar se kush ka marrë me të vërtetë vaksinën dhe kush ujin fiziologjik. Midis atyre që morën fiziologjik në vend të vaksinës ishte një kirurg, i cili u desh të ndërpresë operacionin. Duket se gabimi ndodhi në kohën e administrimit, pasi vaksina hollohet me solucion të kripur dhe këtu mund të ketë patur një shkëmbim të shisheve. Mediat lokale janë përpjekur që të kontaktojnë me kompaninë e shëndetësisë për të mësuar se çfarë ka ndodhur, por nuk kanë asnjë informacion. Ngjarja ka ndodhur më 15 Janar, po mbetet e paqartë nëse është përsëritur ditë të tjera.