Marrëdhëniet midis Francës dhe Turqisë janë përkeqësuar në mënyrë drastike muajt e fundit për shkak të komenteve të presidentit francez Emmanuel Macron mbi Islamin dhe karikaturave të diskutueshme të Profetit Muhamed. Sidoqoftë, të dy vendet gjithashtu nuk bien dakord për një numër çështjesh, të tilla si Nago-Karabaku, lufta në Siri dhe kërkimi i naftës dhe gazit i Turqisë në Mesdhe.Ndërkohë presidenti turk Rexhep Tajip Erdogan ka thënë së fundmi se shpreson që Franca së shpejti do të heqë qafe presidentin Emmanuel Macron, duke e përshkruar homologun e tij si një "barrë".
"Macron dhe Franca po kalojnë një periudhë shumë të rrezikshme në të vërtetë. Shpresa ime është që Franca të heqë qafe problemin Macron sa më shpejt të jetë e mundur", tha Erdogan, duke folur para gazetarëve në Stamboll.
Gjatë viteve, Turqia dhe Franca nuk kanë rënë dakord mbi një numër çështjesh gjeopolitike; megjithatë, mosmarrëveshja është kthyer në një grindje të hidhur në muajt e fundit.
Në fillim të tetorit, Macron njoftoi një plan për të luftuar "separatizmin islamik". Në një fjalim, presidenti tha se Franca, e cila ka popullsinë më të madhe të pakicës myslimane në Evropë, përballet me një rrezik nga separatizmi islamik. Ky i fundit, tha ai, mban ligjet e tij mbi të gjithë të tjerët dhe shpesh krijon një "kundër-shoqëri".Plani i qeverisë erdhi si përgjigje e sulmeve të shumta terroriste që kanë ndodhur në Francë në vitet e fundit.
"Islami është një fe që është në krizë në të gjithë botën sot, ne nuk po e shohim këtë vetëm në vendin tonë", tha Macron.