Lidhur me situatën e krijuar në doganën e Kakavijës ku mijëra njerëz janë duke pritur në radhë kilometrike për të kaluar kufirin drejt shtetit fqinj ka reaguar analisti, Andi Bejtja.
Ai ka bërë një shkrim të shkurtër në Facebook ku thotë se vendi është katandisur me një qeveri që nuk bën as “sikur” po merr masat për të ndihmuar qytetarët e vet, të bllokuar prej ditësh në kufirin shqiptaro – grek.
Dhe realisht asnjë masë nuk është marrë veçse qytetarëve iu është shpërndarë ujë dhe si thotë Bejtja me gaz ndërsa ndonjë më me fat përfitoi edhe ujë pa gaz.
Ndërsa nuk u bë asnjë mbledhje qeverie apo një reagim konkret nga opozita përveç sharjeve në Facebook për të nxitur reagimin e kësaj qeverie.
Statusi në Facebook:
Dita e tretë e radhëve kilometrike në Kakavijë: një katastrofë e vërtetë humanitare: një 10-vjeçar i vdekur dhe të moshuar e të mitur që kanë kaluar natën të shtrirë si lopë. Deri tani dorën e shtetit e kanë parë vetëm në etiketat e ujit me gaz, apo në rastin më fatlum pa gaz, që iu shpërndanë mbrëmë: Nuk ngrihet asnjë shtab emergjence për këtë katastrofë të vërtetë humanitare; nuk mblidhet asnjë këshill bashkiak; nuk duket as Kryqi i Kuq, as kryqi i bardhë....Zero dhe Shoqëria civile: të paktën të ngrënë çadra ku të ofrojnë ndihmë mjekësore dhe ushqimore...Opozita mjaftohet vetëm duke sharë kryeministrin në Fb, në vend që t'i tundë dhëmbët dhe t'i bëjë ultimatume e t'i vërë afate për menaxhimin e situatës, si qeverisë edhe pushtetit lokal...Shkurt dhe shqip, edhe njëherë ashtu si për Kovidin: nuk ka asnjë shans që një vend me parametrat, indekset nga më të këqinjtë në Europë dhe Rajon, për ekonominë, shëndetësinë, korrupsionin, organizimin shtetëror, respektimin e protokolleve, transparencën...etj, etj, të ketë sukses në luftën kundra kovidit apo çdo situate tjetër të ngjashme...dhe në kriza të tilla humanitare... Por çfarë është me e keqja, sot po shohim se ky shtet është i paaftë të bëj edhe "sikur "... Sikur mbledh një shtab, bën një mbledhje këshilli bashkiak, mobilizon ushtrinë, ngre dhjetë çadra, çon ca mjekë e ca ushqime, i bën thirrje organizatave humanitare për ndihmë, etj, etj ....Po jo, asgjë nga këto! E pra nëse nuk bën asgjë nga këto, të bëjë atë që di më mirë: t'i japë për menaxhim me koncesion radhën kilometrike të Kakavijës, një privati...