Mësohet se një 36-vjeçar nga Kosova, është arrestuar disa ditë më parë nga policia në pikën kufitre të Morinës, pasi u dyshua se kishte vjedhur një mjet tip “Lamborghini” dhe po tentonte ta fuste në Shqipëri. Ai u identifikua si shtetasi Labinot Ramadani, me letra zvicerane. Ndërkohë Interpol Roma dhe Bazeli kanë sjellë përgjigjen në lidhje me automjetin luksoz që u sekuestrua disa ditë më parë.
Njoftohet se mjeti nuk rezulton i vjedhur dhe se ka dokumente të rregullta. Arrestimi është bërë më 28 korrik, por vetëm më datë 4 gusht dokumentet i kanë kaluar Prokurorisë së Kukësit për veprimet e nevojshme hetimore. Tashmë Ramadani me shumë mundësi do të lirohet, pasi doli i pafajshëm, ndërsa nuk është njoftuar se si do të veprohet në lidhje me dëmin që i ka shkaktuar pala shqiptare.
