Mes 5 viktimave të kësaj të enjte nga koronavirusi, Ministria e Shëndetësisë ‘harroi’ të përfshinte edhe mësuesin nga Rrësheni. Gjin Kola ndërroi jetë në moshën 57 vjeçare. Përjashtimi i mësuesit nga lista ditore detyroi ministren e arsimit Besa Shahini të ngushëllonte familjarët nëpërmjet rrjeteve sociale.
Nuk dihet ende se përse Ministria e Shëndetësisë nuk e përmendi emrin e mësuesit Kola. Kjo nuk mendohet të jetë arsye e përplasjes së dy ministreve por shton dyshimin se autoritetet shëndetësore po manipulojnë me shifrat. E për të nxjerr bllof Manastirliun, Shahini i përmend në postimin e saj se çdo jetë është e shenjtë dhe duhet mbrojtur.
Besa Shahini shkruan:
Mora lajmin e hidhur që një nga mësuesit tanë të nderuar në qytetin e Rrëshenit ka humbur sot betejën me COVID-19. Shpreh dhimbjen dhe respektin për këtë mësues të vyer e me përvojë dhjetëra vjeçare, si për stafin e shkollave ku ai ka dhënë mësim, ashtu dhe për nxënësit që ai ka edukuar ndër vite. Ndaj këtë dhimbje me familjarët e mësuesit Kola, me nxënësit dhe kolegët e tij. Dua të theksoj edhe një herë nevojën që gjithsecili prej nesh të zbatojë sa më me rigorozitet të gjitha masat e nevojshme për tu mbrojtur nga ky virus i pabesë dhe i padukshëm. Çdo jetë e juaja dhe e familjarëve tuaj është e shenjtë dhe duhet mbrojtur nga të gjithë ne si shoqëri, prandaj të respektojmë me rigorozitet të gjitha protokollet shëndetësore.
