Messi te Interi? Nuk është më një thashethem merkatoje, por një hipotezë konkrete. Kjo pasi palët kanë kontakte të vazhduashme dhe mund të ketë shanse që në fund të arrijnë një marrëveshje madhështore.
Pak ditë më parë, mediat italiane raportuan se babai i Lionel Messit, Jorge Messi ka blerë një apartment në rrugën Joe Viale, shumë pranë zyrave të Interit, ndërsa sot është konfirmuar se edhe vetë ylli argjentinas ka marrë një shtëpi në qytetin e Milanos.
Numri 10 i Argjentinës dhe Barcelonës ka marrë një shtëpi në rrugën e Lirisë, një nga zonat më të lakmuara të Milanos, e njëjta ku ndodhen edhe zyrat e klubit të Interit, që prej kohës kur pronësinë e mori grupi kinez Suning.
Këto informacione të shtyjnë llogjikisht të spekulosh që ylli argjentinas po përgatitet për të jetuar në Milano dhe u japin edhe më shumë forcë zërave se po punohet për një transferim të tij te Interi, ndoshta që këtë verë.
Vetë Messi nuk ka preferuar të komentojë këto zëra, duke u përqendruar maksimalisht në Champions League, i vetmi trofe ku Barcelona është ende në lojë dhe do të provojë ta fitojë për të shpëtuar sezonin.
Kontrata e yllit argjentinas me Barcelonën skadon verën e ardhshme dhe deri tani palët nuk kanë arritur marrëveshjen për rinovimin. Nga kjo situatë kërkon të përfitojë Interi, duke i ofruar argjentinasit një kontratë faraonike që do e bënte dhe futbollistin më të shtrenjtë në planet.
