Juventusi është eliminuar nga Champions League në fazën e të 1/8-ave pavarësisht fitores 2-1 ndaj Lyonit në ndeshjen e kthimit mbrëmjen e sotme në Torino.
Bardhezinjtë kishin humbur me rezultatin 1-0 takimin e parë në Francë, ndërsa me gjithë fitoren në sfidën e sotme, Lyoni kualifikohet në çerekfinale falë golit në terren si skuadër mike.
Një gabim i Rodrigo Bentacur u kushtoi vendasve penallti, ndërsa Memphis Depay realizoi me panenka për epërsinë e ekipit francez në minutën e 12’. te ndeshjes.
Te Juventusi nuk u dorëzuan dhe vazhduan të rrezikonin me Federico Bernardeschin dhe Cristiano Ronaldon. Portugezi barazoi shifrat në 1-1 gjithashtu me penallti.
"Zonja e Vjetër" hyri në pjesën e dytë me ide të qartë se duhej t’i shënonte dy gola për t’u kualifikuar më tej.
Ishte serish Ronaldo, i cili mori një top nga jashtë zonës, krijoi hapësirë dhe goditi me të majtën, ku portieri mik nuk arriti ta ndalte duke u shënuar dhe goli i avantazhit.
Megjithatë, vetëm kaq, pasi ndeshja u mbyll 2-1 dhe Juventusi tashmë e sheh veten jashtë Champions League. E gjithë përgjegjësia bie mbi trajnerin Sarri, për të cilin tani posti i trajnerit nuk është më i sigurt.
