Rikthehen sonte në mbrëmje ethet e Champions League pas një pauze më të gjatë se pesë muajsh, për shkak të pandemisë së coronavirusit. Disa ndeshje të Ligës së Kampionëve të fazës së 1/8-tës kanë mbetur pa zhvilluar ndeshjen e kthimit dhe sot pritjes i erdhi fundi,
Mbrëmjen e sotme do zhvillohen dy ndeshje kthyese të fazës së 1/8-tës, ku katër skuadra luajnë për dy vende të çerekfinales së Ligës së Kampionëve. Përballja më e fortë dhe më interesante pritet të zhvillohet në "Etihad", ku Manchester City pret Real Madridin.
City ka fituar takimin e parë në "Santiago Bernabeu" me rezultatin 2-1 dhe është favorit për të kaluar më tej, por nuk do e ketë aspak lehtë, pasi luajnë përballë rekormenëve të këtij kompeticioni dhe madrilenët gjithashtu besojnë shumë në kualifikim.
Takim interesant pritet të zhvillohet edhe në "Allianz Stadium" të Torinos, ku Juventusi pret Lyonin. Ndeshja e parë e zhvilluar në Francë është fituar nga Lyoni me rezultatin 1-0, por bardhezinjtë janë të bindur se do arrijnë përmbysjen e madhe dhe do të kalojnë në çerekfinale.
Të presim e të shohim a do ia dalin. Të dyja ndeshjet do zhvillohen me start nga ora 21:00 dhe për fatin e keq do jenë me stadiume të boshatusura, pasi tifozët mungojnë si shkak i shpërthimit të pandemisë COVID-19.
JUVENTUS-LYON 21:00
MANCHESTER CITY-REAL MADRID 21:00
