Pas lirimit nga burgu të ish-anëtarit të Bandës së Durrësit, Endrit Dokle dhe të akuzuarit për atentatin me snajper në burgun e Vaqarrit, Ergys Kolaveri, gjykata ka marrë një tjetër vendim të bujshëm.
Raportohet se Gjykata e Tiranës ka lënë të lirë katër të arrestuarit për rastin e 3.4 milionë eurove të sekuestruara në makinën tip "Toyota Yaris" dy vite më parë.
Gjykata ka ndryshuar masën e sigurisë nga "arrest me burg" në "detyrim paraqitje" për të dënuarit.
Gjykata ka vendosur ‘Detyrim Paraqitje’ për kushërinjtë e shpallur në kërkim ndërkombëtar, Elvis dhe Alfred Vladin, për babë e bir Edi Lika dhe Klevi Cani, Alban Mollaymeri të akuzuar për pastrim parash në kuadër të grupit të strukturuar kriminal dhe për Agim Çekajn, i akuzuar vetëm për armbajte paleje.
Kujtojmë këtu se në 24 qershor 2018, u sekuestruan 3.4 milionë euro cash, të fsehura në bagazhet e dy makinave "Toyota Yaris", të cilat po transportoheshin me trajler nga Belgjika.
Asokohe u arrestuan katër persona dhe u shpallën në kërkim dy kushërinjtë, Elvis dhe Alfred Vladi.
Ata dyshohet se ishin porositësit e ngarkesës së sekuestruar, që ishte nisur nga Gjermania, përmes linjës së trageteve Ancona-Bari.
Ndërkohë në këtë çështje u përfol edhe emri i kreut të grupit parlamentar të PS-së, Taulant Balla, i cili u akuzua nga opozita si i përfshirë në këtë rast.