Denoncime të shumta, mesazhe nga qytetarë të Maminasit mbushin çdo mëngjes Inboxet në rrjetet sociale të JOQ Albania.
Avari kjo prej disa vitesh që është kthyer në kryefjalën e mëngjesit dhe mbrëmjes, pasi në këtë zonë vazhdon veprimtarinë e saj e pashqetësuar fabrika e tullave Kid-Alb shpk në pronësi të biznesmenit Asllan Baraj, e cila lëshon një ndotje mjedisore të jashtëzakonshme.
Emetimi i gazrave të rënda që lëshon kjo fabrikë 24h është kthyer në një nga çështjet më shqetësuese, përsa i përket mirëqenies shëndetësore të banorëve të zonës.
Vetëm pak kohë më parë një qytetar denoncoi aktivitetin e kësaj fabrike me fjalët:
Motoja e kësaj kompanie është: Ne besojmë në cilësi! Por a mund të konsiderohet brenda normave të ndotjes mjedisore tymi që furrat e kësaj kompanie lëshojnë në ajër parreshtur, që prej vitit 2006 (vit kur kjo kompani u licencua)?
Për të shmangur koston e lartë dhe shpenzimet, nuk përdoren filtrat e ajrit kundër ndotjes së mjedisit, me qëllim që të kursehet sa më shumë energjia elektrike, pa marrë parasysh se kjo kosto po u kushton jetën qindra banorëve që jetojnë aty pranë. Shumë kompani ende vazhdojnë të përdorin teknologjitë tradicionale, për të patur sa më shumë prodhim dhe impianti i filtrimit është një nga investimet më të kushtueshëm për një fabrikë. Nëse filtrat e ajrit për këto fabrika që shkaktojnë ndotje të madhe në mjedis nuk përmbushin normat e caktuara, aktiviteti i tyre duhet të pezullohet.
Tymi që buron nga këto fabrika ndikon në uljen e cilësisë së ajrit në zonat përreth, çka mund të shkaktojë shumë çrregullime të frymëmarrjes tek njerëzit që banojnë në këto zona.
Para disa javësh në lidhje me një çështje të ngjashme, u ndërmor një protestë nga banorët e zonës së Laprakës në Tiranë, të cilët protestuan kundër fabrikës së tullave Edil-Centro pasi shpreheshin se vijonte aktivitetin e saj pa leje mjedisore dhe ishte gjobitur shpeshherë nga Inspektoriati i Mjedisit për ndotjen e shkaktuar.
Xhiroja e biznesit në vitin 2018 për këtë kompani ishte 6 milionë euro. Ndërsa në vitin 2015, i është refuzuar leja mjedisore e Tipit A nga Agjencia Kombëtare e Mjedisit.
