Një aksion i gjerë është zvhilluar nga Policia e Korçës, duke çuar në pranga 1 doganier, 3 punonjës të Policisë Kufitare, 1 shtetas, si dhe janë shpallur në kërkim 7 të tjerë.
Personat e arrestuar akuzohen për disa vepra penale, si: “Kontrabandë me mallra të ndaluar”, “Kontrabanda me mallra të tjera”, “Kontrabanda nga punonjës që lidhen me veprimtarinë doganore”, “Falsifikimi i vulave, i stampave ose i formularëve”, “Korrupsioni aktiv i personave që ushtrojnë funksione publike”, “Shpërdorimi i detyrës”.
Gjatë aksionit, policia ka sekuestruar një sasi të konsiderueshme mallrash të dyshuara kontrabandë (konfeksione dhe goma mjetesh të përdorura).
Njoftimi:
Policia e Korçës në bashkëpunim me Sektorin e Shërbimit për Çështjet e Brendshme dhe Ankesat (SHÇBA) në kuadër të operacionit tëkoduar “Gorica”, kanë vënë në pranga 5 persona nga të cilët 1 doganier, 3 punonjës të Policisë Kufitare, 1 shtetas, gjithashtu janë shpallur shpallen në kërkim 7 të tjerë.
Personat e arrestuar janë shtetasit me iniciale:
• Sh.D., 35 vjeç, banues në Korçë, me detyrë doganier pranë Doganës së Goricës. • Y.Rr., 53 vjeç, banues në Tiranë, punonjës policie me detyrë përgjegjës turni. • B.H., 54 vjeç, banues në Korçë, punonjës policie me detyrë kontrollor. • J.K., 51 vjeç, banues në fshatin Kallamas, Pustec, punonjës policie me detyrë trup shërbimi, pranë Pikës së Kalimit Kufitar Goricë. • A.H., 58 vjeç, banues në Korçë.
Si edhe u shpallën në kërkim shtetasit: M.K., 35 vjeç, banues në Bilisht; N.S., 44 vjeç, banues në Liqenas; A.H., 42 vjeç; E.Z., 44 vjeç; A.P., 37 vjeç; Dh.K., 23 vjeç; M.Xh., 35 vjeç, banues në Korçë.
Autoritetet njoftojnë se, punonjësi i Doganës (shtetasi Sh.D.,) në bashkëpunim me punonjësit e policisë dhe shtetasit e lartpërmendur, kanë lejuar kalimin e 4 mjeteve tip kamion të ngarkuar me mallra të dyshuara kontrabandë konfeksione dhe goma automjetesh të përdorura, nga Pika e Kalimit Kufitar Goricë në territorin e Republikës së Shqipërisë, duke shmangur detyrimet doganore dhe falsifikuar të dhënat e mjeteve në dokumentacionet e tyre dhe në Sistemin Tims, ku 2 nga këto mjete u gjetën dhe bllokuan në cilësinë e provës materiale.
Policia njofton se po vijon puna për dokumentimin e plotë të ngjarjes, kapjen e personave të shpallur në kërkim, si edhe gjetjen dhe bllokimin e 2 mjeteve të tjera.
Materialet i kaluan Prokurorisë pranë Gjykatës së Shkallës së Parë Korçë për veprat penale “Kontrabandë me mallra të ndaluar”, “Kontrabanda me mallra të tjera”, “Kontrabanda nga punonjës që lidhen me veprimtarinë doganore”, “Falsifikimi i vulave, i stampave ose i formularëve”, “Korrupsioni aktiv i personave që ushtrojnë funksione publike”, “Shpërdorimi i detyrës”.
