Inxhinieri i Ndërtimit, Besnik Dervishi ka folur për 'Rtv Ora' në lidhje me situatën pas tërmetit.
Ai është shprehur se nevojë emergjente është pikërisht klasifikimi i banesave, si të banueshme apo jo të banueshme.
Gjithashtu, e rëndësishme sipas inxhinierit është që banorët të mos traumatizohen, si dhe ekspertët duhet të përfshihen në këtë punë të rëndësishme.
Dervishi shton edhe faktin se që të marrësh dhe gjykosh një ndërtesë është e banueshme apo jo është detyrë e projektuesit.
Besnik Dervishi tha për RTV Ora se:
Nevojë imediate në këto momente është që të klasifikohen kush është e banueshme dhe kush nuk është e banueshme. Kjo kërkon kompetencë të madhe, kërkon shpejtësi dhe specialistë. Në kuptimin që ka të bëjë me jetën e njeriut. Njerëzit janë të tmerruar. Ne jemi të lidhur me banesën, sepse vijmë nga një periudhë që kemi vuajtur për banim dhe e kemi pjesë të jetës sonë. Kur i thua tjetrit që kjo banesë nuk do jetë e përdorshme, madje do shkatërrohet, e ke shkatërruar psikologjikisht. Fillimisht mos i traumatizojmë, ti themi që kjo është e pariparueshme. Kjo duhet bërë me specialistë. Nuk desha të them që ata specialistë që janë në terren nuk janë të zotët. Ekspertët e huaj janë, por nuk e dimë me çfarë tagri janë. Që të marrësh dhe gjykosh një ndërtesë është e banueshme apo jo është një detyrë e vështirë. Në radhë të parë është detyrë e projektuesit. Ai e di si e ka ndërtuar, ai e di ku i dhemb. Duhet parë me dëmtimet që ka. Ai është i pari që duhet të jetë pjesë e kësaj ekspertize. Ne kemi inxhinierë projektues shumë të zotët.