Drejtori i Përgjithshëm i Policisë së Shtetit, Ardi Veliu hodhi të gjitha akuzat poshtë se mund tu jenë mbajtur para nga paga efektivëve të policisë për dëmet nga tërmeti.
Mirëpo, një dokument i firmosur nga drejtori i policisë së Shkodrës, Niko Brahimaj vërteton komplet të kundërtën.
Ora Neës ka zbardhur dokumentin, ku tregon se efektivët janë detyruar të paguajnë dhe më poshtë ka publikuar edhe pagesat e tyre në varësi të gradëve.
Dokumenti urdhëron efektivët e policisë së qarkut Shkodër të kontribuojnë në vlera financiare sipas gradave. Kështu drejtori, zv drejtori dhe shefat e komisariateve detyrohen të paguajnë nga 5 mijë lekë nga rroga e tyre.
Shefat e sektorëve dhe shefat e seksioneve pranë drejtorisë dhe komisariateve detyrohen të kontribuojnë nga 4 mijë lekë, ndërsa specialistët, ndihmës specialistët dhe efektivët e tjerë nga 3 mijë lekë. Së fundmi drejtori Brahimaj urdhëron që gjithë efektivët civile të paguajnë shumë 2 mijë lekë në ndihmë të familjeve të prekura nga tërmeti.
Të premten drejtori i Policisë së Shtetit në një deklaratë për mediat tha se nga kontributi vullnetar i efektiveve janë mbledhur 104 milionë lekë.
Veliu ndër të tjera tha se mirëkuptonte dhe me shume se 2000 efektivët që nuk kanë patur mundësi të kontribuojnë.
PAGESAT E EFEKTIVËVE
Drejtori, zv drejtori, shefat nga 5 mijë lekë
Shefat e sektorëve dhe seksionit nga 4 mijë lekë
Efektivët dhe ndihmës specialistët nga 3 mijë lekë
Efektivët civilë nga 2 mijë lekë.