Tërmeti i fuqishëm i 26 nëntorit la pas 51 viktima, qindra persona të plagosur dhe mijëra ndërtesa të shkatërruara e dëmtuara rëndë.
Një nga viktimat e katastrofës natyrore më të madhe të dekadave të fundit që ka goditur Shqipërinë ishte edhe kryekomisari Bajram Hajdarmataj.
54-vjeçari gjeti vdekjen në rrënojat e Shtëpisë së Pushimit numër 4 në Kavalishencë, ku ndodhej për një trajnim, në zonën e Plepave në Durrës.
Mesa duket rreziku për këtë godinë ishte paralajmëruar nga ana e inxhinierëve pas tërmetit të 21 shtatorit, ndonëse mazhoranca e mohoi një gjë të tillë.
Zv/ministrja e Brendshme, Rovena Voda, ishte shprehur:
Por Ora News disponon një dokument të firmosur nga grupi i inspektimit prej 4 inxhinerësh, në të cilin thuhet qartë se “Hoteli i ri i Shtëpisë së Pushimeve në Durrës”, referuar godinës numër 4, nuk paraqet dëmtime në konstruksionin mbajtës të tij, por ai aktualisht është i pashfrytëzueshëm pasi copat e tullave dhe të suvave mund të shkëputen dhe të shkaktojnë aksidente në njerëz.
Sipas këtij dokumenti, pas tërmetit të 21 shtatorit, objekti kishte nevojë për rikonstruksion të muraturës dhe ky alarm i ishte komunikuar edhe drejtorit të këtij institucioni.
Fatkeqësisht shqetësimi i grupit të inspektimit, që nuk u mor parasysh në kohë, i mori jetën kryekomisarit, pasi një pjesë e godinës u shemb për shkak të tërmetit të dytë në 26 nëntor.
Por në godinën numër 5, natën e 26 nëntorit kanë qenë edhe studentë të Akademisë së Policisë dhe trajnerë, që fatmirësisht nuk kanë pësuar dëmtime.
Për shkak të kësaj situatë dhe pikëpyetjeve të ngritura për këtë rast, PD ka kërkuar informacion zyrtar qeverisë shqiptare, lidhur me verifikimet e kryera në Godinën Nr. 4 të Shtëpisë së Pushimit të Ministrisë së Brendshme në Kavalishenca të Durrësit, e cila u shkatërrua në tërmetin e datës 26 Nëntorit ku humbi jetën kryekomisari Bajram Hajdarmetaj.