Florinda Zymeri është e reja nga Prishtina, e cila është cilësuar e pafajshme nga gjykata e Prishtinës, pasi akuzohet për organizim dhe pjesëmarrje në organizatë terroriste.
Ajo akuzohet se në gusht të vitit 2014 me dëshirë të plotë, përmes Aeroportit Ndërkombëtar të Prishtinës “Adem Jashari”, ka udhëtuar për në Stamboll të Turqisë, pastaj drejt Irakut dhe Sirisë, për t’u bashkuar me organizatën terroriste “ISIS”.
Pas leximit të akuzës nga prokurorja Habibe Salihi, e akuzuara ka mohuar në tërësi fajësinë për veprën që i ngarkohej. Ajo ka thënë se nuk e ndien veten fajtore dhe se është e pafajshme.
Pas deklarimit të të akuzuarës lidhur me fajësinë, kryetarja e trupit gjykues, gjykatësja Valbona Selimaj ka njoftuar atë se brenda 30 ditësh mund të bëjë kundërshtimin e provave dhe të paraqes kërkesë për hedhje të aktakuzës.
Për identifikimin e personalitetit të të akuzuarës, gjykatësja Selimaj ka kërkuar që Zymeri të heqë përkohësisht mbulesën e fytyrës dhe e akuzuara ka vepruar sipas urdhrit të gjykatës.
Prokuroria Speciale e Republikës së Kosovës, më 19 nëntor 2019, ka ngritur aktakuzë ndaj Florinda Zymeri, për shkak të veprës penale “organizimi dhe pjesëmarrja në grup terrorist”, nga neni 143, paragrafi 2 të Kodit Penal të Republikës së Kosovës. E akuzuara bënë pjesë në grupin e grave të riatdhesuara nga Siria, më 24 prill të këtij viti.
Foto ilustruese
