Presidenti, Ilir Meta ka dekretuar ditën e sotme lirimin nga detyra të ambasadorit shqiptar në Turqi, Gent Gazheli. Lirimi nga detyra është bërë me propozim të kryeministrit Edi Rama. Në vend të tij është emëruar Kastriot Robo.
Robo u emërua si ambasador i Jashtëzakonshëm dhe Fuqiplotë i Republikës së Shqipërisë në Republikën e Turqisë, rezident, si dhe ambasador i Jashtëzakonshëm dhe Fuqiplotë i Republikës së Shqipërisë në Republikën e Azerbajxhanit, në Republikën Islamike të Iranit, në Republikën e Kirgistanit, në Republikën Islamike të Pakistanit, në Republikën e Gjeorgjisë, në Republikën Islamike të Afganistanit dhe në Republikën e Kazakistanit, jorezident.
Lirimi nga detyra i Gent Gazhelit vjen disa ditë pasi diplomati u vu në qendër të kritikave nga mediat italiane lidhur me vogëlushin shqiptar Alvin Berisha.
Gazheli kishte premtuar se nuk do e linte në kampet e Sirisë 11-vjeçarin, por në fund thjesht nuk iu përgjigj telefonatave të gazetarit italian duke mos bërë asgjë për t’i shpëtuar jetën Alvinit.
Ishte pikërisht gazetari i “Le Iene” ai i cili shprehu publikisht zhgënjimin me ambasadorin Gazheli.
