Analisti dhe gazetari, Mustafa Nano ka qenë i ftuar në emisionin 'Historia ime', ku ka folur për librin e tij të titulluar 'Si e kam njohur'.
Në të, përfshihen rrëfime të shumta të Nanos në lidhje me 55 figura publike, të cilët i njeh edhe personalisht.
Teksa komentonte personazhet, ai u ndal te kryeministri i vendit, Edi Rama.
Sipas gazetarit, Rama është i zbrazët nga motivimet dhe thekson se ai është kryeministri më i trishtuar në botë.
Muç Nano shprehet se:
Rama, ndër personazhet e librit, është njëri prej atyre që unë e njoh më mirë sepse kam pasur edhe kontakte personale. Kontaktet e mia personale me Ramën kanë qenë kontaktet e mia më të mira me një politikan sepse kanë qenë të natyrës intelektuale. Kemi shkëmbyer idera politike, nuk kam pasur marrëdhënie siç kanë shumë kolegë të mi me politikanët, që i kanë shumë të afërta. Nuk i kam pasur asnjëherë të afërta, jemi takuar, kemi biseduar, kemi shkëmbyer ndonjë libër. E këtij niveli, e këtij lloji ka qenë marrëdhënia. Si politikan e kam ndjekur vazhdimisht, fillimisht më ka inspiruar me natyrën e vetë, me kurajon e vetë. Por me kalimin e kohës, Rama i ka humbur motivimet e mira që ka pasur, nuk ka më motivime, është i zbrazët nga motivimet. Por unë e shoh, ai është edhe i trishtuar, është Kryeministri më i trishtuar në botë.
