Gjobat e policisë janë kthyer në një makth pothuajse për të gjithë qytetarët e Tiranës, të cilët kanë një makinë, pasi vendet e parkimit në kryeqytet lënë shumë për të dëshiruar. Mirëpo jo të gjithë e kanë këtë “hall”, pasi në qoftëse ke një makinë të shtrenjtë apo një stemë policie, prokurorie apo edhe bashkie në xhamin e mjetit, je i privilegjuar, si nga gjobëvënësit e Veliajt ashtu edhe nga ata të Lleshit.
E një situatë e tillë ka ndodhur pasditen e sotme pranë rrethrrotullimit të "Zogut të Zi" në Tiranë.
Sipas një video të mbërritur në redaksinë e JOQ ALBANIA, shihet se dy punonjës policie në detyrë, kanë vënë re një makinë e cila ishte e parkuar në vendin e gabuar, dhe janë nisur drejt saj për t’i vendosur gjobë. E pikërisht këtu ka ndodhur më e çuditshmja.
Pasi i janë afruar makinës, ata kanë parë se në xhamin e përparmë të “Benzit” të shtrenjtë ka qënë një stemë policie, çka ka bërë të sprapsë dy efektivët e policisë.
Ata shohin njëri-tjetrin në sy dhe nuk dinë se çfarë të bëjnë, duke treguar një mungesë profesionalizmi. Pas kësaj ata bëjnë një telefonatë, dhe qëndrojnë përpara makinës konfuz e të pavendosur, edhe pse “Benzi” e meritonte një gjobë.
Pas gati një minute, ata duket se kanë marrë konfirmimin se “Benzi” luksoz është e një kolegu të tyre ose i një miku të qeverisë, kanë parë rreth e rrotull dhe janë larguar ashtu siç erdhën.
