Një nga të plagosurit e atentatit te Mbikalimi i Shkozetit mësohet se ka lënë spitalin. Pas 18 ditësh, ka lënë spitalin e Durrësit këtë pasdite Aleksandër Laho ose i njohur ndryshe si “Rrumi”.
Burimet thonë se Rrumi shoqërohej nga njerëzit e tij, pa polici. Ndërkohë prokurori vazhdon që të qëndrojë në spital.
Për momentin, Redjan Rraja është i vetmi i arrestuar për ngjarjen e ndodhur më 1 nëntor, ku mbetën të plagosur Prokurori Ndoj, miku i tij Aleksandër Laho, Alias Pëllumb Muharremi, i njohur ndryshe si “Rrumi i Shijakut” dhe Andi Maloku, i cili ndërroi jetë disa ditë më vonë.
Prokuroria e Krimeve të Rënda vijon hetimet për zbardhjen e ngjarjes, pasi akoma nuk është provuar se kush ishte shënjestra e atentatit. Ndërkohë organit të akuzës nuk i kanë mbërritur ende rezultatet e ADN-së nga laboratori i kriminalistikës, mbi gjurmët biologjike të gjetuara në makinën e atentatorëve, që u gjet e braktisur në fshatin Shakafan të Ishmit rreth një orë pas atentatit.
Kujtojmë se atentati ndaj prokurorit Ndoja ndodhi në 1 Nëntor, pranë mbikalimit të Shkozetit në Durrës. Teksa prokurori, shoferi i tij dhe ‘i forti’ i Sukthit ishin duke lëvizur me makinë, një breshëri automatiku derdhet mbi mjetin e tyre, pasojë e të cilit mbeti viktimë Andi Maloku dhe u plagos Aleksandër Laho dhe vetë prokurori, këta të fundit jashtë rrezikut për jetën.
