Qeveria lë pensionistët me “zemër të ngrirë”, deri tani nuk ka shpërblim për “gjelin e detit”

Pensionistët janë ndoshta pjesa e shoqërisë shqiptare që mezi presin fundin e vitit për të marrë atë pak shpërblim që jep shteti, i cili në shumicën e rasteve “tallet” me ta. Mirëpo këtë vit ata duhet të presin deri në javën e parë të dhjetorit për të mësuar nëse këtë vit do të mund të marrin shpërblimin për gjelin e detit apo jo.

Ministrja e Financave dhe Ekonomisë, Anila Denaj, deklaroi se ende nuk është vendosur asgjë pasi duhet të analizohen të ardhurat dhe më pas do të vendoset, pasi për shpërblimet ministrisë së financave i duhen 3 mld lekë. Vitin e kaluar pensionistët morën shpërblim nga 5 mijë lekë.

Ministria e Financave po analizon situatën buxhetore për të parë se sa para mund të teprojnë nga projektet që nuk po finalizohen në 2019, për ti riakoluar si shpërblim fund viti për pensionistët dhe familjet në nevojë.

Ministrja Denaj deklaroi:

Kemi thënë që gjithmonë është parë në dhjetor, pasi është bërë një analizë, se çfarë kursimesh janë fituar. Ne jemi akoma në nëntor. Me lejoni të bëjmë një analizë, të përfundojmë buxhetin, jemi duke parë kursimet dhe në përfundim do themi nëse do mundemi apo jo. Bëhet fjalë për 3 mld lekë. Kështu që ne duhet të gjejmë nga kursimet një shumë të tillë."

Kjo deklaratë erdhi pas diskutimit të buxhetit në komisionin e Veprimtarisë ku deputetët u treguan pesimistë në lidhje me afatet për zbatimin e procesit të fiskalizimit.