Komisioni i Venecias në raportin e ri të publikuar ka deklaruar se Presidenti Ilir Meta nuk i ka tejkaluar kompetencat e tij me dekretin që anulonte zgjedhjet e 30 qershorit dhe vendoste një datë të re për zgjedhjet vendore. Në tekstin e opinionit përfundimtar të Venacias, publikuar ditën e sotme, kishte ndryshime të mëdha nga dokumenti paraprak që thoshte se kreu i shtetit kishte shkelur kushtetutën.
Në pikën 99 të variantit të mëparshëm thuhet se “Presidenti tejkaloi kompetencat e tij sipas Kushtetutës fillimisht duke anuluar e më pas, duke shtyrë zgjedhjet lokale.”
Por në opinionin përfundimtar kjo fjali është hequr plotësisht. Ajo është riformuluar dhe sipas saj: “I takon parlamentit dhe në fund Gjykatës Kushtetuese, që të përcaktojë nëse anulimi, e më pas shtyrja e zgjedhjeve lokale, përbën një shkelje e Kushtetutës dhe nëse shkelja është e një natyre të tillë serioze, që do të mund të lejonte shkarkimin e Presidentit”.
Ndryshim ka pasur edhe në pikën 101 të përfundimeve të Venecias. Konstatimi se “Presidenti tejkaloi kompetencat e tij kushtetuese duke anuluar dhe shtyrë më pas zgjedhjet lokale përtej mandatit zgjedhor të autoriteteve lokale, pa një bazë të veçantë ligjore...”, është zëvendësuar në opinionin përfundimtar me një formulim hipotetik se "Presidenti mund të ketë tejkaluar kompetencat e tij kushtetuese duke anuluar dhe shtyrë zgjedhjet lokale përtej mandatit zgjedhor të autoriteteve lokale pa një bazë të veçantë ligjore..”.
Por në opinionin përfundimtar të Venecias thuhet se , Presidenti mund të anulojë zgjedhjet për organet e qeverisjes vendore, vetëm në një situatë e cila plotëson kriteret për marrjen e masave të jashtëzakonshme”. Por “edhe atëherë Presidentit i duhet një bazë ligjore specifike për të shtyrë zgjedhjet”.
