Peshëngritja shqiptare vazhdon të njolloset me turp. Një tjetër peshëngritës shqiptar ka rezultuar pozitiv në testin antidoping për Lojërat Olimpike Londër 2012.
Endri Karina ka përdorur substanca të ndaluara dhe gjithçka është zbuluar pas testimit të bërë në një prej mostrave të urinës që i janë marrë gjatë aktivitetit.
Në testin e parë që iu bë sportistit, ai nuk rezultoi pozitiv. Por, pas kontrollit të mostrës së dytë, ai ka rezultuar pozitiv, 7 vite pas organizimit të garës, shkruan "Panorama Sport".
Tashmë ai është futur në listën e gjatë të sportistëve me doping në 2012-ën. Karina garoi në kategorinë 94 kg asokohe, duke u renditur në vendin e 14-të, por pasi 7 sportistë të tjerë kishin rezultuar pozitiv me doping, Endri u rendit në vendin e 7-të.
Endri Karina bëhet lojtari i tetë që rezulton me doping në kategorinë 94 kg në Lojërat Olimpike Londër 2012. Peshëngritësi shqiptar është pezulluar nga Federata Ndërkombëtare e Peshëngritjes ndërsa Komiteti Olimpik Ndërkombëtar, do të vendosë më vonë për masat e mëtejshme.
