Ndeshja e djeshme mes Sivasportit dhe Beshiktashit në kampionatin turk ka sjellë edhe një moment paniku për gjithë të pranishmit në stadium. Teksa po luhej minuta e 47-te e sfidës, ka ndodhur një përplasje e fortë në zonën e Sivasporit.
Portieri i ekipit vendas, Samasa, në një tentativë për të grushtuar topin, u përplas me futbollistin kundërshtar Bojd, teksa të dy mbetën të shtrirë në tokë.
U desh ndërhyrja e mjekëve, por situata doli nga kontrolli, pasi portieri, teksa po dilte jashtë fushe, ka humbur ndjenjat duke u rrëzuar para mjekut të skuadrës.
Stafi mjekësor u detyrua të ndërhynte sërish për të shmangur tragjedinë, teksa portieri u transportua menjëherë drejt spitalit. Sivaspori triumfoi në këtë përballje me rezultatin 3-0, teksa mediat turke raportojnë se Samasa është jashtë rrezikut për jetën.
