“Përdhosje e vendit të shenjtë”/ Kandidatja e PS: S’po bëja politikë brenda kishës

Pas intervistës së bërë nga kandidatja e Partisë Socialiste, Majlinda Bufi, në Kishën e Shën Kollit, ka reaguar ashpër Mitropolia e Shenjtë e Apollonisë dhe Fierit.

Përdorimi i objektit të kultit për politikë nga ana e kandidates për bashkinë e Roskovecit është cilësuar si sakrilegj që përdhos vendet e shenjta.

Por me sa duket, nuk mendon aspak kështu socialistja Bufi, e cila ka reaguar kundrejt kritikave të shumta që i janë bërë.

Ajo thotë se nuk ka bërë fushatë politike, por thjesht ka dhënë intervistë.

Sipas Bufit, në kishë nuk ushtrohet aktivitet fetar, por kisha është vetëm një monument kulture, ndaj logjikisht “s'ka bërë ndonjë gjë të keqe”.

Në reagimin e saj, Majlinda Bufi thotë:

Kisha e Shën Kollit është objekt i Ministrisë së Kulturës. Nuk bëra fushatë politike, por thjeshtë dhashë një intervistë. Nëse në këtë kishë do të ushtrohej aktivitet fetar jam dakord, por ai është thjeshtë një objekt monument kulture”.

Video u transmetua edhe në ERTV nga Rama, ndërsa Majlinda Bufi flet për punën e saj në bashki si dhe objektivat që ka për vjeçarin e ardhshëm.