Pasi është duke bërë paraqitje fantastike si në Ligën e Kombeve, ashtu edhe në eleminatoret e Europianit, tashmë Përfaqësuesja e Kosovës do të bëhet me një stadium të ri dhe super modern.
Aty, Kosova do të luajë ndeshjet e saj kualifikuese dhe ku sigurisht do të ketë më shumë kushte e më shumë hapësira për tifozerinë e zjarrtë të “Dardanëve” e cila mbush në çdo ndeshje tribunat.
Sot në Prishtinë, është prezantuar projekti i parë i stadiumit kombëtar, i cili është parashikuar që të ndërtohet në Drenas.
Ai do të jetë një impiant modern, i cili do të ketë të gjitha tribunat e mbuluar dhe një kapacitet prej 30 mijë spektatorësh, ashtu si edhe hapësira të tjera për stërvitje përkrah tij, parking apo ambiente tregtare.
Ky është projekti i më i madh infrastrukturor sportiv që është bërë ndonjëherë në Kosovë e Shqipëri, si dhe impianti më i madh gjithashtu, duke llogaritur se “Arena Kombëtare” në Tiranë përllogaritet të ketë pak më shumë se 22 mijë vende të ulura.
