Shqipëria është prekur nga fatkeqësitë natyrore gjatë ditëve të fundit. Në Korçë janë regjistruar mbi 50 lëkundje tërmeti, të cilat kanë shkaktuar dëme të shumta. Më i prekuri nga tërmetet është fshati Floq.
Në total, 200 shtëpi kanë pësuar dëmtime serioze dhe nuk janë më të banueshme. Për këtë arsye shumë qytetarë janë evakuuar dhe për momentin po qëndrojnë në çadra. Qytetarët janë ankuar për kushtet në çadra, ku sipas tyre mungojnë ushqimet dhe shtretërit. Ata kërkojnë që shteti të shpallë gjendjen e emergjencës, gjë të cilën duhet ta kishte bërë më herët. Mesa duket kryeministri Edi Rama nuk do t'ja dijë shumë se çfarë po ndodh me banorët në Korçë, pasi është i zënë duke prezantuar kandidatët socialistë për bashkitë.
Sikur të mos mjaftonte tërmeti, Shqipëria prej më shumë se 24 orësh ndodhet nën regjimin e shiut. Si pasojë e reshjeve të shumta, qytete të ndryshme në Shqipëri kanë pësuar probleme të shumta. Në Tiranë pjesa më e madhe e qytetit është nën pushtetin e ujit. Kjo ndodh për shkak se pusetat janë të bllokuara dhe bashkia nuk ka bërë pastrimin e tyre.
Kreu i Bashkisë së Tiranës, Erion Veliaj në vend që të merret me problemet jetike të banorëve të Tiranës, vazhdon me projektet fasadë. Kujtojmë këtu se para pak ditësh Veliaj u prezantua nga Rama si kandidat për Bashkinë e Tiranës dhe dy pika shi nxorrën në pah sesa seriozisht ka punuar bashkia për qytetin.
E njëjta gjë edhe në qytetin e Durrësit, i cili kthehet në një Venecia të vogël sa herë bie shi. Në Durrës nuk ndërhyhet prej vitesh në sistemin e kanalizimeve, ndërsa punimet bëhen sa për sy e faqe, pasi me dy pika shi, u ça asfalti i hedhur vetëm dy javë më parë në rrugën e stadiumit. Kjo tregon edhe njëherë punët shkel e shko të Rilindjes, të cilën natyra e nxjerr gjithmonë zbuluar.