Ministrja e Infrastrukturës, Belinda Balluku, njoftoi pak kohë më parë, se qeveria po punon për dhënien me koncesion të autostradës Tiranë-Durrës. Në projekt do të përfshihet edhe zgjerimi i rrugës, që do të thotë se pemët do të rrafshohen sërish. Sipas BIRN, Bashkia e Tiranës i shty planet për zëvendëzsimin e palmave të thara me pisha në nëtor të 2017-ës.
Dy muaj më vonë, bashkia nënshkroi një kontratë me Fusha shpk, duke e përjashtuar nga ligji për prokurim publik, metodë që përdoret në raste të veçanta. Kontrata kishte vlerën 332 milion lekë dhe parashikonte mbjelljen e pishave nga mbikalimi i Kamzës deri te ai i Kasharit. Këto para i shtohen 90 milion lekëve, që u përdorën për mbjelljen e palmave.
Kontrata e bashkisë e Fusha shpk, u denoncua nga PD dhe u kallëzua në prokurori. PD akuzonte Veliaj se po paguante 5 milion lekë për një pishë. Gjithashtu Fusha shpk, po hetohet edhe për "shpërdorim detyre" dhe "shkelje e barazisë në tendera". Çështja ndërkohë është ende nën hetim dhe nuk ka të ndaluar.
Ndonëse kreu i Bashkisë së Tiranës, Erion Veliaj e ka kthyer në reklamë mbjelljen e pemëve, për ato në autostradë nuk është ndier fare. Sipas BIRN, fondet për mbjelljen e pishave, u miratuan në fund të vitit 2017, pas ndryshimit në buxhetin afat mesëm. Kontrata u ekzekutua plotësisht gjatë muajve janar-maj 2018. Nga prilli deri në shtator, BIRN i ka dërguar 3 kërkesa për informim bashkisë, por ka marrë mbrapsh 3 shkresa, ku nuk i ishin kthyer përgjigje pyetjeve të kërkuara.
Në korrespondencën e katërt në tetor të 2018-ës, erdhi përgjigja se informacioni i kërkuar ishte sekuestruar nga prokuroria. Në mungesë të një përgjigjë, BIRN bëri numërimin në terren, ku rezultuan 405 pisha. Më pas u pyetën tregtarët e drurëve në Kavajë dhe Tiranë dhe rezultoi se çmimi i pishave shkon nga 700-1000 euro. Ndërkohë Bashkia e Tiranës i ka paguar Fusha shpk, shuma deri në 5500-6500 euro.
Heqja dhe vendosja e pemëve kanë shkaktuar një dëm të madh në buxhetin e shtetit, problem i cili është evidentuar edhe nga KLSH-ja. Ndërkohë ARRSH, e hoqi përgjegjësinë nga vetja kur u pyet nëse ishte në dijeni për zgjerimin e rrugës, duke ja kaluar përgjegjësinë Bashkisë së Tiranës.
Shkrimin e plotë nga Reporter.al mund ta lexoni këtu.