Erion Veliaj në vitin 2015 u zgjodh në krye të Bashkisë së Tiranës dhe erdhi në këtë post me premtimet për të ulur taksat dhe varfërinë për qytetarët. Por gjatë katër viteve në detyrë, ka bërë krejt të kundërtën.
Ai nuk ka ndaluar së abuzuari me xhepat e qytetarëve të Tiranës edhe pse në postimet e tij në rrjetin social Facebook propagandohet e kundërta. Veliaj ka shtuar e shumëfishuar taksat për banorët e kryeqytetit, tashmë ka vendosur që të dyfishojë, në mënyrë tërësisht abuzive, gjobat për parkimin e automjeteve.
Sipas "Boldnews.al" dhe sipas një fotoje gjobe të mbërritur në redaksi, e bërë në zonën e "Myslym Shyrit" citohet se vartësi i Lali Erit, polici bashkiak Valand Hoxha, ka gjobitur një automjet me 2 mijë lekë të reja, për shkak se ka përfunduar afatin e kohës së qëndrimit tek parkimet me pagesë, të administruara nga Bashkia e Tiranës.
Deri më sot, gjoba për këtë shkelje ka qenë 1 mijë lekë të reja. Por, Erion Veliaj, pasi arriti të merrte konfirmimin për të kandiduar për një mandat të dytë në krye të Bashkisë së Tiranës, ka nisur ta konsiderojë veten të paprekshëm, duke shtuar gjobat abuzive për qytetarët.
Rreth 3 vjet më parë, Erion Veliaj krijoi “Tirana Parking”, një kompani publike që siguron miliona euro të ardhura në vit nga pagesat e qytetarëve. Nëpërmjet këtij projekti, Bashkia e Tiranës tarifoi pjesën më të madhe të rrugëve të qytetit, duke e shndërruar parkimin në një proces thuajse të pamundur për mijëra makina që qarkullojnë në ditë në kryeqytet.
“Tirana Parking” rezulton një prej kompanive më fitimprurëse të Bashkisë së Tiranës, së bashku me Ujësjellës-Kanalizime, të dyja struktura që janë akuzuar shpesh publikisht për abuzimet me çmimet dhe me masat administrative.
Çdo ditë në media të ndryshme, por sidomos në redaksinë JOQ Albania, mbërrijnë denoncime të qytetarëve për abuzime nga më të mëdhatë nga ana e Policisë Bashkiake.
Tashmë këto denoncime janë bërë pjesë e një rutine të pandashme të shqiptarëve, ku anormale mund të duket pjesa kur nuk do të ketë më denoncime apo raste flagrante të shkeljes së ligjeve.
