Qeveria po i zhvat me skemën e TVSH-së, fermerët paralajmërojnë një tjetër protestë

Para disa ditësh fermerët e Lushnjes protestuan duke flakur në rrugë qumështin. Kjo ndodhi në shenjë demonstrative ndaj uljes së TVSH-së, ku në këtë mënyrë fermerët detyrohen të ulin çmimet e produkteve të tyre.

Shumë fermerë marrin kredi ndërsa prodhimet e tyre po flaken në rrugë e në plehra për shkak të qeverisë. E pavarësisht protestave të fermerëve qeveria Rama nuk ka ndërmend të ndalet në rrënimin që po u bën këtyre fermerëve.

Grumbulluesit dhe fermerët kanë paralajmëruar se do të kthehen në protestë më 3 prill në qytetin e Lushnjës, pasi Ministria e Financave u ka dhënë përgjigje negative lidhur me ndryshimin e skemës së TVSH-së. Ata kërkojnë që qeveria të reagojë dhe TVSH-ja të barazohet si në shitje dhe në blerje.

Skema e re e TVSH-së ka hyrë në fuqi që prej 1 janarit me paketën e re fiskale çfarë ka sjellë kosto shtesë për grumbulluesit, të cilët paralajmërojnë që të ulin çmimet ndaj fermerëve.

Alban Zusi, kryetar i Qendrës së Eksporteve tha se lidhur me problematikën do të vënë në dijeni edhe Ambasadat dhe Bankën Botërore.

Deklarata e e Zusit:

Do ti drejtohemi të gjithë shoqatave të Dhomave të Tregtisë për tu solidarizuar me këtë çështje, do ti drejtohemi institucioneve ndërkombëtare, do ti drejtohemi Departamentit për Bujqësinë në Bashkimin Europian, do ti drejtohemi Bankës Botërore. Me datë 3 do të ketë përsëri një protestë tjetër, ku përveç një grupimi të caktuar të grumbulluesve dhe fermerëve të Lushnjes, Fierit dhe Beratit do tu bashkohen dhe fermerë të rajoneve të tjera të Shqipërisë si Shkodra, Korça, Gjirokastra."

Zusi tha më tej se fermerët kërkojnë që qeveria të marrë masa dhe të barazojë TVSH-në si në shitje, niveli i të cilës është 20 për qind dhe në blerje ku niveli shkon në 6 për qind.

Ai shton:

Më e ndershme, më etike dhe më sociale është që TVSH-ja e produkteve ushqimore të ulet në nivelin 6% edhe në shitjen e tyre te konsumatori fundor."