Në kohën kur të dy udhëheqnin qeveritë e dy shteteve shqiptare, Hashim Thaçi dhe Sali Berisha ishin miq të mirë. Madje nuk ndaheshin në përurim projektesh e as fushata elektorale.
Por, pak kohë më pas kur i pari u bë president dhe i dyti ngeli në opozitë, gjërat kanë ndryshuar drastikisht, raporton JOQ Kosova.
Sali Berisha ka deklaruar më herët se projekti për shkëmbimin e territoreve mes Prishtinës dhe Beogradit është një projekt i Serbisë. Ish-kryeministri sulmoi Presidentin e Kosovës Hashim Thaçi, të cilin e quajti “argat” që mbron këtë projekt.
Thaçi e ftoi në debat televiziv, por Berisha refuzoi dhe tha se më përpara do të dilte në debat me presidentin e Serbisë, Vuçiq.
Mirëpo, mbrëmë në Report Tv, Presidenti i Kosovës tha se kur ai e luftonte Miloshevicin, Berisha e kishte ndihmuar diktatorin serb.
“Nëse dikush ngre hipoteza dashakeqe dhe djallëzore, nuk do të pijnë ujë as tek unë, as te qytetarë e Kosovës dhe në veçanti, ata që e kanë ndihmuar Slobodan Milosheviçin, kur unë e kam luftuar atë, nuk do t’u funksionojnë idetë pseudonacionaliste apo të deficiteve të tyre patriotike. Shefi im është populli i Kosovës, vullneti i popullit të Kosovës, gjaku i derdhur për liri. Jam i gatshëm të diskutoj me secilin, të ballafaqohem. Kam bashkëpunuar shumë mirë si kryeministër, duke vrapuar bashkë me Berishën nëpër fshatrat më të thella të Dukagjinit, duke folur për bashkim kombëtar. Kemi pasur një bashkëpunim produktiv, për interesin e shtetit të Kosovës dhe të Serbisë. Madje kam marrë pjesë edhe në fushatën elektorale të Berishës, në atë kohë kur ishte me Ramën, duke marrë pjesë në hapjen e tunelit në Kalimash. Edhe në takime të tjera”, tha Thaçi.
Ndryshe, marrëveshja finale me Serbinë ka acaruar raportet e shumë politikanëve në Kosovë dhe Shqipëri, përfshirë këtu edhe Edi Ramën, Ilir Metën, Sali Berishën, Hashim Thaçin, Ramush Haradinajn, Kadri Veselin e Albin Kurtin.
