Gjykata Administrative ka lënë në fuqi gjobën prej 46 milion lekësh ndaj kompanisë “EKMA”, vendim ky i marrë nga gjyqtari Avni Sejdi.
Kjo kompani administrin tregun Agro-Ushqimor dhe akuzohet për abuzim me tregtarët me tarifa të dyfishuara.
Në raportin e Autoritetit të Konkurrencës, thuhet se kjo kompani faturon qira të lartë, ndërsa dysfishon çmimin e ujit dhe të energjisë. “EKMA” është në pronësi të biznesmenit Klodjan Allajbeu dhe Haxhi Bardhi.
Ndërkohë Autoriteti i Konkurrencës i përfaqësuar nga avokati Indrit Rekan, deklaroi se EKMA abuzon ndaj tregtarëve me faturim prej 20.5 lekësh për kW/h për energjinë elektrike ndaj tregtarëve dhe 360 lekë m3 për ujin kur çmimet janë disa herë më të lira. Gjithashtu sipas autoritetit të konkurencës, kjo kompani ka krijuar monopol me qiratë. Mësohet se të njëjtin qëndrim ka mbajtur edhe avokatura e shtetit.
Ky është tregu i vetëm për produktet agro-ushqimore në Tiranë, i ndërtuar pas mbylljes së tregut Dinamo. Sipas Autoritetit të Konkurrencës, tregtarët paguajnë 74% më shumë qira sesa bizneset e zonës. Për vitin 2017, “EKMA” ka arkëtuar 380 milion lekë të reja të ardhura.