Një vdekje e mistershme kishte ndodhur në Tiranën e vitit 1984, por që u mbajt fshehur nga shteti dhe u zbulua tek më vonë.
Bëhet fjalë për një kosovar që, siç thuhet, u hodh nga kati i 14-të i Hotel Tirana pas presionit të sigurimit, transmeton JOQ Kosova.
Presioni i asaj kohe thuhet se ishte bërë ndaj kosovarit për t'u futur në rrethin e bashkëpunëtorëve të shtetit, mirëpo këtë gjë ai nuk e kishte pranuar dhe i mori vetes jetën.
Kosovarit i kërkonin të bëhej bashkëpunëtor për të spiunuar kosovarët që erdhën në Shqipëri.
Kjo është historia që e sjell gazeta Tema me rrëfim të Ferdinand Dojës:
Në verën e vitit 1984 në qendër të Tiranë ndodhi një ngjarje e rëndë, që pushteti i kohës e mbajti pothuajse të fshehtë.
Nga kati i 14-të i hotel Tiranës u hodh një person, i cili vdiq në vend.
I sapo ardhur nga Kosova, ai ndodhej nën presionin e oficerëve të Sigurimit të Shtetit për t’u bërë bashkëpunëtor, por nuk e pranoi këtë dhe u hodh nga dritarja e hotelit.
Pas 35 vjetësh, kjo histori vjen nga hetuesi i kësaj çështje, Ferdinand Doja.
I ftuar në emisionin “Debati në Channel One”, ai rrëfeu historinë, që për rastësi ishte edhe dëshmitari që e pa të gjithë skenë, por edhe e hetoi atë .
“Ishte pasdite rreth orës 18:00 dhe për koicidencë unë isha në sheshin “Skënderbej” duke ecur me biçikletë.
Në atë kohë unë isha hetues në Hetuesinë e Tiranës dhe atë ditë isha i gatshëm.
Papritur shikoj që nga kati i 14-të u hodh një person dhe u rrëzua në verandën e hotelit, pra në katin e dytë.
Natyrisht që ai vdiq në vend.
Pas pak çastesh më marrin në radio nga hetuesia.
Përveçse isha dëshmitar, isha edhe hetues i çështjes, një rastësi që ndodh shumë rrallë kjo.
Shkova në vendin e ngjarjes dhe bashkë me ekspertët nisëm hetimet.
Personi që u hodh nga dritarja ishte i moshës 55 vjeç dhe ishte nga Kosova, dhe jetonte në zonën e Mamurrasit.
Ishte i martuar dhe kishte dy djem.
Ishte nga ata kosovarë që erdhën në Shqipëri pas protestave të vitit 1981.
Ngjarja lidhej me shtrëngimin që shefi i Degës së Brendshme të Krujës po i bënte kosovarit të bëhej bashkëpunëtor i Sigurimit të Shtetit.
Kosovarit i kërkonin të bëhej bashkëpunëtor për të spiunuar kosovarët që erdhën në Shqipëri.
Ai ishte marrë fshehtas nga oficerët e Sigurimit dhe për 4 ditë familja nuk dinte asgjë.
Djemtë kishin bërë denoncim në polici, por askush nuk u jepte përgjigje.
Kosovari në fjalë nuk e pranoi kërkesën dhe nën presion e sipër preferoi vetëvrasjen.
Ai mbahej në hotel Tirana sepse Sigurimi I Shteteit kishte dy katet e fundit atje si qendër pune.
Ishte një hetim delikat dhe ne akzuam direkt kryetarin e degës për shpërdorim detyre.
Kryetari u shkarkua nga ajo detyrë dhe u vu nën akzuë por me urdhër nga lart ne e pushuam çështjen”.