Ministri gjerman, Michael Roth, është shprehur i shqetësuar me qëndrimin e kryeministrit shqiptar, Edi Rama, lidhur me mundësinë për shkëmbim territoresh mes Kosovës dhe Serbisë.
Roth ka konfirmuar atë që është raportuar në media, se ish-ministri Ditmir Bushati kishte qenë kundër ndryshimit të kufijve, duke shtuar ndërkaq që Rama po i shmanget kësaj pyetjeje, raporton JOQ Kosova.
"Opinioni shqiptar aktualisht është disi i shqetësuar në lidhje me përpjekjet diplomatike për zgjidhjen e konfliktin midis Kosovës dhe Serbisë. Ish-ministri i jashtëm i Shqipërisë, Ditmir Bushati, ka qenë kundër ndryshimit të kufijve në Ballkan. Kryeministri dhe de jure ministri i jashtëm i Shqipërisë, Edi Rama, i shmanget përgjigjes së kësaj pyetjeje në publik, por shumëkush mendon se ai është pajtuar tashmë me këtë plan", ka thënë Roth për Deutsche Welle.
Ndërkaq, Roth ka folur edhe për ndikimin e Shqipërisë në çështjen e normalizimit të marrëdhënieve në mes të Kosovës dhe Serbisë, duke thënë se mund të jetë në interes të Shqipërisë ta parandalojë destabilizimin në rajon që mund të vinte nga ndryshimi i kufijve.
"Nga Shqipëria ne presim që kjo ta përdorë në mënyrë konstruktive ndikimin e saj politik dhe të vazhdojë të angazhohet në mënyrë konstruktive për stabilitet në të gjithë rajonin. Kjo vlen veçanërisht për çështjet që kanë të bëjnë me normalizimin ndërmjet Kosovës dhe Serbisë. Mund të jetë vetëm në interes të Shqipërisë, si pjesë e rajonit, që të parandalojë me çdo kusht një destabilizim të ri të Ballkanit Perëndimor, gjë që detyrimisht do të vijonte nga ndryshimi i kufijve", ka shtuar ministri gjerman.
Sidoqoftë, nga gazetarët dhe opinionistët në Kosovë dhe Shqipëri është thënë se Edi Rma është në krah me presidentin e Kosovës, Hashim Thaçi, në projektin e marrëveshjes finale në atë që e quajnë "korrigjim të kufirit".