Presidenti dhe kryeministri kosovar kanë mbajtur një raport refuzimi ndaj njëri-tjetrit, e madje edhe kanë thumbuar shpesh.
Përplasja mes tyre nisi kur presidenti Hashim Thaçi hodhi idenë e korrigjimit të kufirit me Serbinë, si çelës të arritjes së marrëveshjes finale, e cila gjë u kundërshtua haptazi nga kryeministri Ramush Haradinaj, raporton JOQ Kosova.
Që nga fundvera udhëheqësit e dy institucioneve kryesore në vend nuk kanë folur mes vete. Kulmi shënohet kur Haradinaj vendosi taksë ndaj Serbisë, e cila gjë bllokoi dialogun.
Pas kërkesës së SHBA dhe BE për heqje të taksës, Haradinaj u pyet se kur do të ndodhte kjo, mirëpo ai befasoi duke thënë se "dikur do të shkrihet bora", që nënkuptonte se taksa do të hiqej më vonë.
Pikërisht shkrirja e borës u bë detaji që përdori Thaçi për ta thumbuar Haradinajn. "Bora ka zënë të shkrihet shpejt. Uroj të mos bëhet skllotë", ishte deklarata e Thaçit që konfirmoi "luftën" mes presidentit dhe kryeministrit.
E që të përmirësohen marrëdhëniet mes këtyre dy politikanëve, u desht një darkë në shtëpinë e Thaçit. Pajtimi, sipas analistëve dhe gazetarëve në Kosovë, u mundësua nga Edi Rama, që u bë "kumbarë" i rregullimit të raporteve mes tyre.
Por, një detaj i darkës së mbrëmshme mori vëmendjen e të gjithëve. Shumë gazetarë, përfshirë edhe Berat Buzhalën, thonë se vendi ngjitur me Pacollin i takonte Baton Haxhiut, i cili në këtë rast del të jetë fotografi.
Sidoqoftë, nëse jo detyra e përbashkët për Kosovën, darka i pajtoi dy liderët kosovarë. Ata menjëherë sot u takuan në zyrën e Haradinajt pak para nisjes së Thaçit për Amerikë.