Edhe pse pikat e basteve janë mbyllur, shqiptarët sërisht e kanë gjetur mënyrën për të luajtur. Me një kartë krediti dhe akses në internet, mund të vendosni një skedinë online, pasi ligji i miratuar nga qeveria, nuk ndalon dot aktivitetin e kompanive të huaja.
Për këtë arsye, Drejtoria e Përgjithshme e Policisë së Shtetit, i ka dërguar Autoritetit të Komunikimeve Elektronike dhe Postare një listë me 7 domaine që duhen bllokuar.
Në total numri i faqeve është 1320 por edhe në rast bllokimi ekziston mundësia e aksesimit të tyre nëpërmjet shërbimit 'Proxy'. Ky shërbim fsheh vendodhjen e adresës tuaj, duke mos u kapur në filtrat e vendosura nga AKEP.
Ndërkohë nga kjo situatë kanë përfituar edhe disa kompani, të cilat kanë transferuar aktivitetin në Kosovë. Nëpërmjet shërbimeve që ato ofrojnë, mund të depozitosh para online dhe fitimin ta tërheqësh nga edhe Shqipëria.
Për shkak të opsioneve që ofron tekonologjia, duket se do të jetë shumë i vështirë aplikimi i këtij ligji.
