Ndërkohë që Onkologjiku dhe pacientët e shtruar atje vuajnë nga mungesa e ilaçeve, një gazetar në hall i cili ka të ëmën të sëmurë, i ka dërguar një mesazh Ministres së Shëndetësisë, Ogerta Manastirliu.
Por, si duket Ministrja nuk ka marrë mundimin t’i kthejë përgjigje.
Rastin në fjalë e ka denoncuar deputeti demokrat, Bardh Spahia. Në një postim të tijin, ku ka publikuar edhe mesazhin që gazetari i na nisur Manastirliut, deputeti Spahia e ka cilësuar rastin si një paturpësi kriminale.
Postimi i plotë:
Mund të mendohet që një mjek nuk tronditet lehtë, pasi vetë profesioni të stërvit racionalitetin, para të mundurës e të pamundurës. Por sinqerisht ishte e pamundur të mos prekeshe nga dhimbja njerëzore që përçon ky mesazh i një gazetari, për më të shtrenjtën në jetë, nënën. Ilaçet mungojnë tek onkologjiku për trajtimin e të sëmurëve, e ndërprerja e një cikli trajtimi, kushton shtrenjtë, me jetë. Këtë hall i ka shpjeguar gazetari ministres OGERTA MANASTIRLIU. E ministrja në fjalë as e ka konsideruar për t’i dhënë përgjigje, e jo më të impenjohej për të bërë c’ka i takon, DETYREN! Moj zonjë, mirë që nuk merr vesh nga fusha që ke pranuar të drejtosh, po pjesën njerëzore, ku dreqin e ke! Njerëzit, pacientët nuk janë tendera zonjë, as PPP, as koncesione! Janë ata që së pari paguajnë edhe për rrogën tënde, e të shefit tënd. Pra zonjë, së pari detyrimin e ke me cdo qytetar që përballet me shëndetësinë që ti drejton, e sic të është faktuar në mesazh, ajo është situata ku e keni katandisur: onkologjiku pa ilace! Arroganca e padija nuk janë punë zonjë! Të kombinuara me indiferencën janë më së paku paturpësi kriminale! Duhet t’ju vijë zor, që informoheni për situatën e nuk reagoni! Që ta kesh të qartë: shëndetësia nuk reformohet me fasadë, se ke të bësh me jetë njerëzish, e ato lloj statistikash bëjnë më shumë se të të nxijnë fytyrën!”
