Kur jemi pak ditë para festave të fundvitit, rreth 55 të dënuar që vuajnë dënimin në burgun e Burrelit i kanë dërguar letër ministres së Drejtësisë për amnistinë.
Përmes letrës së tyre, të burgosurit i kërkojnë ministres të rishqyrtojë kushtet për përfitimin e amnistisë pak ditë para fundvitit.
Letra e plotë e të burgosurve:
Ne të poshtëshënuarit që po vuajmë si të paraburgosur në IEVP Burrel, parashtrojmë kërkesën tonë si më poshtë vijon:
Dëgjuam në televizor se Ministria e Drejtësisë ka bërë një propozim për amnisti. Kjo pa dyshim që është e nevojshme dhe e domosdoshme për të gjithë ata që po vuajnë dënimet.
Por konstatojmë se kushtet që kërkon kjo amnisti nuk plotësohen nga të paraburgosurit dhe të burgosurit, pasi konstatohen se janë dhënë gjykime dhe dënime të padrejta si për drogën për dhunën në familje por edhe për vepra të tjera.
Konstatohet se ka patur padrejtësi si në hetim po ashtu edhe në gjykimin e çështjeve të ndryshme.
Gjithashtu vërejmë se Gjykatat e rretheve Dibër dhe Mat kanë dhënë dënime më të rënda se Gjykatat e rretheve të tjera.
Duke u bazuar në çfarë thamë më sipër mendojmë se kjo amnisti që është parashikuar të jepet, nuk lehtëson asnjë të paraburgosur ose të burgosur.
Kërkesa jonë kolektive është që amnistia e këtij viti që është edhe viti i Skënderbeut të ishte e përgjithshme dhe për një afat kohor 2-3 vjet.
Në njëfarë mënyre kjo do të ishte një zgjidhje që për mendimin tonë është e paanshme dhe e duhura për kushtet në të cilat ndodhemi.
Kemi besim se Ministria e Drejtësisë do ta marrë në konsideratë këtë kërkesë. Faleminderit për mirëkuptimin.”
